Gujarati News

વોશિંગ્ટન, તા.૧૪ : એલોન દ્વારા ટ્વીટર ખરીદવામાં આવ્યું છે ત્યારથી સોશિયલ મીડિયા કંપનીઓ સતત ચર્ચામાં રહી છે. એલોન મસ્ક અનેક તબક્કામાં ૧૦ હજારથી વધુ કર્મચારીઓને છૂટા કરી ચૂક્યા છે. આ ઉપરાંત, તેમણે ઓફિસમાંથી કામ ન કરતા લોકોને બાકાત રાખવા, ખાવા-પીવાની સુવિધાઓ ખતમ કરવા જેવા નિર્ણયો પણ લીધા છે. આ દરમિયાન, રવિવારે, તે સ્ટાફ લંચમાં વર્ક ટ્રાન્સફોર્મેશનના ભૂતપૂર્વ ટ્વિટર વાઇસ પ્રેસિડેન્ટ ટ્રેસી હોકિન્સ સાથે જોવા મળ્યા હતા. હોકિન્સ એક અઠવાડિયા પહેલા સુધી ટ્વિટર પર ફૂડ પ્રોગ્રામ જોતા હતા. પોતાના ટ્વીટમાં તેણે લખ્યું છે કે, ટ્વીટર ખાવા માટે પ્રતિ વ્યક્તિ ૨૦ થી ૨૫ ડોલર ખર્ચ કરતું હતું. આનાથી કર્મચારીઓને લંચ અને મીટિંગ દરમિયાન કામ કરવાનું ચાલુ રાખવાની મંજૂરી મળી હતી. હોકિંગે કહ્યું કે, પાછલા વર્ષમાં ઓફિસમાં કોઈ ન આવ્યું હોવાનો મસ્કનો દાવો ખોટો હતો અને આ દરમિયાન ૪૦૦ ડોલરનું લંચ પીરસવામાં આવ્યું હતું. ટ્રેસીએ લખ્યું, 'આ જૂઠ છે. મેં એક અઠવાડિયા પહેલા સુધી આ કાર્યક્રમનું સંચાલન કર્યું હતું. મેં રાજીનામું આપ્યું કારણ કે, હું મસ્ક માટે કામ કરવા માંગતો ન હતો. અમે દરરોજ નાસ્તો અને લંચ માટે એક વ્યક્તિ પર ૨૦ થી ૨૫ ડોલર ખર્ચતા હતા. આનાથી કર્મચારીઓ બપોરના સમયે અને મીટિંગ દરમિયાન કામ કરી શક્યા હતા. ૨૦ થી ૫૦ ટકા લોકો ઓફિસમાં આવતા હતા.

હવે ટ્રેસીના ટ્વીટનો જવાબ આપતા મસ્કે લખ્યું છે કે, ટ્વિટરે છેલ્લા એક વર્ષમાં ફૂડ સર્વિસ પર લગભગ ૧૩ મિલિયન ડોલરનો ખર્ચ કર્યો છે. આ ખર્ચ સાન ફ્રાન્સિસ્કો સ્થિત હેડક્વાર્ટરમાં જ કરવામાં આવ્યો છે. ભૂતપૂર્વ કર્મચારીના દાવાને ખોટા ગણાવતા મસ્કે લખ્યું, ટ્વિટર તેના હેડક્વાર્ટરમાં ફૂડ પર વર્ષે ૧૩ મિલિયન ડોલર ખર્ચે છે. તે જ સમયે, ઓફિસમાં આવનારા લોકોની સંખ્યા માત્ર ૨૫% સુધી જ હતી. ક્યારેક તે માત્ર ૧૦ ટકા જ હતી.

મસ્કે ઓફિસમાં આવતા લોકોની સંખ્યા અને ખાવાના ખર્ચની સરખામણી કરતા સવાલ ઉઠાવ્યા છે. તેમણે કહ્યું કે, અહીં નાસ્તો બનાવનારા લોકોની સંખ્યા ખાનારાઓ કરતાં વધુ હતી. તેમણે કહ્યું કે, અમને મળેલા ડેટા દર્શાવે છે કે, ઓફિસમાં આવનારા લોકોની મહત્તમ સંખ્યા માત્ર ૨૫ ટકા હતી, જ્યારે સરેરાશ માત્ર ૧૦ ટકા લોકો ઓફિસમાંથી કામ કરતા હતા. વાસ્તવમાં, આ આખો મામલો એ સમાચાર પછી શરૃ થયો હતો, જે મુજબ મસ્કે ટ્વિટરની ઓફિસમાં મફત ભોજનની વ્યવસ્થા કરી છે.