Gujarati News

નવી દિલ્હી, તા. ૧૨ : આર્યનંદા બાબુએ સા રે ગા મા પા લિટલ ચેમ્પ્સ ૨૦૨૦ (ટીવી વિશ્વના સિંગિંગ રિયાલિટી પ્રોગ્રામ્સમાંથી એક) નું બિરુદ જીત્યું છે. કેરળના રહેવાસી આર્યનંદે સમગ્ર સીઝનમાં ખૂબ જ સારું પ્રદર્શન કર્યું હતું અને આ શોના વિજેતાનું બિરુદ મેળવ્યું છે. વિજેતા બન્યા બાદ આર્યનંદાને વિજેતા ટ્રોફીની સાથે શોના જજ હિમેશ રેશમિયા, અલ્કા યાજ્ઞિક અને જાવેદ અલી દ્વારા પાંચ લાખ રૂપિયાનો ચેક અપાયો હતો. આર્યનંદા એક સામાન્ય કુટુંબમાંથી આવે છે, જે આ પૈસા ભણવા અને મકાન બનાવવા માટે ખર્ચ કરવા માંગે છે. ઉપરાંત શોના રનર-અપ વિશે વાત કરવામાં આવે તો કોલકાતાની રનિતા બેનર્જી, જે પ્રથમ રનર અપ રહી હતી, અને પંજાબની ગુરકિરતસિંહે મેળવ્યો હતો. વિજેતા સાથે અનુક્રમે બીજા અને ત્રીજા સ્થાને રહેનારા સ્પર્ધકોને ત્રણ અને બે લાખ રૂપિયા પણ એનાયત કરાયા હતા. ફિનાલે પ્રસંગે જેકી શ્રોફ, શક્તિ કપૂર અને ગોવિંદા પણ વિશેષ અતિથિઓ તરીકે જજીશની સાથે હાજર રહ્યા હતા.

આર્યનંદા હજી સાતમા ધોરણમાં ભણે છે અને હિન્દી બોલતી જ નથી. શોમાં તે મલયાલમમાં હિન્દી ગીતો લખતી હતી. આર્યનંદાના માતા-પિતા કોચિમાં બાળકોને દક્ષિણ ભારતીય શાસ્ત્રીય સંગીત શીખવે છે. આર્યનંદા આ અગાઉ વર્ષ ૨૦૧૮ માં સારેગામાપા લિટલ ચેમ્પ્સ તામિલનો રનર અપ રહી હતી. આર્યનંદા કહે છે, હવે અમે ભાડાના મકાનમાં રહીએ છીએ, આ શોમાં જીતેલા પૈસાથી અમે ઘર લઈ જઈશું અને હું મારા ભણતર માટે પણ થોડા પૈસા રાખીશ. શોના અંતિમ એપિસોડની શરૂઆત ટોપ કન્ટેસ્ટંટના પરફોર્ન્સથી થઈ હતી, જેમાં આર્યનંદા બાલા, રનિતા બેનર્જી, ગુરકીરતસિંહ, જાયદ અલી, માધવ અરોરા, સાક્ષમ સોનાવણે અને તનિષ્ક સરકારનો સમાવેશ થાય છે. આ પછી, જનતાના મતના આધારે વિજેતાનો નિર્ણય લેવામાં આવ્યો હતો.