Gujarati News

*    યુવતીએ પંચાયતની વચ્‍ચે યુવક સાથે તેને પ્રેમ હોવાની વાત કહી લગ્ન કરવાની જીદ પકડી હતી.
*    યુવક સાથે લગ્ન કરવા યુવતીએ ખાવા-પીવાનું પણ છોડી દીધું અને મરી જવાની ધમકી આપી.
*  યુવક તેની સાથે લગ્ન કરવા માગતો ન હોવાથી પોતાને સુરક્ષા આપવાની અરજી લઈ પોલીસ મથકે પહોંચ્‍યો.
મુરૈના તા. ૧૨ : આ પ્રેમ કહાની કંઈક અલગ છે. એકતરફી પ્રેમના તમે ઘણા કિસ્‍સા સાંભળ્‍યા હશે, જેમાં યુવકના એકતરફી પ્રેમથી ત્રાસી જઈ યુવતીએ આત્‍મહત્‍યા કરી લીધી હોય કે પછી યુવકે એકતરફી પ્રેમમાં યુવતીની હત્‍યા કરી નાખી હોય. એકતરફી પ્રેમના કિસ્‍સામાં મોટાભાગે યુવક જ યુવતીને પરેશાન કરતા હોવાના કિસ્‍સા બહાર આવતા હોય છે. પરંતુ મધ્‍ય પ્રદેશમાં તેનાથી તદ્દન ઉલટો મામલો સામે આવ્‍યો છે. જેમાં એક યુવતીના એકતરફી પ્રેમથી એટલો ત્રસ્‍ત થઈ ગયો કે તે પોલીસના શરણે પહોંચ્‍યો છે. એક યુવતીના એકતરફી પ્રેમથી યુવક એટલો પરેશાન થઈ ગયો કે તેને પોલીસની મદદ માગવી પડી. આ અનોખો મામલો મુરૈના જિલ્લા નો છે. જયાં એક યુવતી લગ્ન કરવાની જીદ પર આવી ગઈ છે, જયારે યુવક તેની સાથે લગ્ન કરવા ઈચ્‍છતો નથી.
મધ્‍ય પ્રદેશના સબલગઢ ના એક ગામની ૨૨ વર્ષની એક યુવતીને પાસેના ગામમાં રહેતા નવલેશ નામના યુવક સાથે એકતરફી પ્રેમ થઈ ગયો હતો. તેણે યુવકને પોતાના પ્રેમ વિશે ઘણી વખત જણાવ્‍યું અને દર વખતે યુવકે તેના પ્રેમને ઠુકરાવી દીધો. આ દરમિયાન યુવતી જીદ પર આવી ગઈ અને ખાવા-પીવાનું છોડી દીધું. જયારે યુવતીના પરિવારને તેના પ્રેમ વિશે જાણ થઈ તો તે લોકો નવલેશ પર લગ્ન માટે દબાણ કરવા લાગ્‍યા. જેનાથી યુવક ત્રસ્‍ત થઈ ગયો હતો.
નવલેશ અને યુવતી બંને એક જ જ્ઞાતિના છે. આ એકતરફી પ્રેમના મામલે ગામની પંચાયત મળી તો યુવતીએ બધાની વચ્‍ચે જણાવી દીધું કે તેને નવલેશ પસંદ છે અને તેને પ્રેમ કરે છે. જયારે નવલેશે લગ્ન કરવાનો ઈનકાર કરી દીધો તો યુવતીએ મરી જવાની ધમકી આપી દીધી. નવલેશનું કહેવું છે કે, યુવતીના પરિવારજનો તેના ઘરે આવીને તેને મારી નાખવાની ધમકી આપી રહ્યા છે. જેથી કંટાળી જઈ તેણે પોલીસમાં અરજી આપી સુરક્ષાની માગ કરી છે.
પોલીસે જણાવ્‍યું કે, આ ઘટનામાં બીજી બાજુ એ છે કે યુવક અને યુવતી બંને સગીર છે. બંને વચ્‍ચે પહેલા દોસ્‍તી હતી. યુવતી હવે લગ્ન કરવા માગે છે. બંને એક જ સમાજના છે. પોલીસનું તેમાં કોઈ કામ નથી.