Gujarati News

મુંબઇ, તા. ૧૨ : મુંબઇની જુહુ પોલીસે ચોરીના કેસમાં એક ૧૭ વર્ષીય સગીરની ધરપકડ કરી છે. પોલીસના જણાવ્યા મુજબ ચોરે સોનું ચોરીને ગટરના ઢાકણામાં છુપાવી રાખ્યું હતું અને મિત્રો સાથે પોતે બીયર પાર્ટી કરી રહ્યો હતો. પોલીસે તેની ધરપકડ કરી ત્યારે તેની પાસેથી ૨૧ લાખ રૂપિયાના દાગીના મળી આવ્યા હતા.

આ ઘટના મુંબઈના જુહુ પોલીસ સ્ટેશન વિસ્તારમાં બની હતી. નહેરુ નગર વિસ્તારમાં રહેતી પૂજા પોતાના પરિવાર સાથે મહાબળેશ્વરની મુલાકાતે ગઈ હતી પરંતુ જ્યારે તે મહાબળેશ્વરથી પરત ફરી ત્યારે તેના પગ નીચેથી જમીન સરકી ગઈ હતી. તેણે જોયું કે મકાનમાં રાખેલા આશરે ૨૧ લાખ રૂપિયાના સોનાના દાગીના ગાયબ હતા. ઘરમાં ચોરી થઈ છે તે સમજવામાં પૂજાને લાંબો સમય લાગ્યો નહીં. પૂજા નજીકના જુહુ પોલીસ સ્ટેશન ગઈ હતી અને આ કેસમાં એફઆઈઆર નોંધાવી હતી. આ પછી પોલીસે કેસની તપાસ શરૂ કરી હતી. તપાસ દરમિયાન પોલીસને ખબર પડી કે પૂજાના પરિવારનો કોઈપણ સભ્યે ઘરે નહોતો. જેથી ચોરીની આશંકા આસપાસના લોકો પર જ હતી.

પોલીસે આ વિસ્તારમાં રહેતા ગુનાહિત છબીઓ ધરાવતા લોકોની પૂછપરછ શરૂ કરી હતી. આ દરમિયાન પોલીસને જાણ થઈ કે એક છોકરાએ મિત્રો સાથે પાર્ટી કરવા માટે બીયરની બોટલ અને અન્ય વસ્તુઓનો ઓર્ડર આપ્યો હતો. બસ ત્યાં જ પોલીસને ચોરને પકડવાની લિંક મળી ગઈ.

પોલીસે તપાસ કરતાં જાણવા મળ્યું કે છોકરો નવમું ફેલ હતો અને તે કામ શોધી રહ્યો હતો. તેના પિતા ટેમ્પો ડ્રાઇવર છે. આવી ખરાબ પરિસ્થિતિમાં પાર્ટી માટે પૈસા ક્યાંથી આવ્યા? ત્યારબાદ પોલીસે જ્યારે તેને પૂછપરછ માટે બોલાવ્યો ત્યારે તેણે ચોરીની કબૂલાત કરી હતી.

જ્યારે તેના શરીર પર ઉઝરડા જોઇને પોલીસ દ્વારા તેની સખત પૂછપરછ કરવામાં આવી હતી, ત્યારે તેણે જણાવ્યું હતું કે ગટરમાં ઉતરવાના કારણે તેને ઈજા પહોંચી છે. બાદમાં પોલીસે તે ગટરની તપાસ કરી ત્યાં ચોરેલું સોનું મળી આવ્યું. તપાસમાં એવું પણ બહાર આવ્યું છે કે આ સગીર ચોરે અગાઉ મોબાઈલની ચોરી કરી હતી અને આવી જ મેનહોલમાં છુપાવ્યો હતો.