Gujarati News

નવી દિલ્હી તા.૧ર : જીવન વિમાના ગ્રાહકો માટે સારા સમાચાર છે. જો પોલીસીધારકનું પોલીસી ખરીદવાના ૯૦ દિવસની અંદર હોત થઇ જાય તો પણ વિમા કંપની નિશ્ચિત રકમ (સમ-એસ્યોર્ડ)નું ચુકવણુ કરવાનો ઇન્કાર કરી ન શકે. રાષ્ટ્રીય ગ્રાહક નિવારણ પંચે એક મામલામાં વિમા કંપનીને આદેશ આપ્યો છે તે મૃતક પોલીસીધારકના પરિવારને ૯ ટકાના વ્યાજ સાથે ર.પ૦ લાખ રૂપિયાની રકમનું ચુકવણુ કરી દયે. આ મામલામાં પોલીસીધારકનું મોત પોલીસી ખરીદ્યાના ૯૦ દિવસની અંદર થયુ હતુ.

આ મામલો પંજાબના ફાઝીલ્કાના કુલવીન્દર સિંહનો છે તેમણે ર૬મી મે ર૦૧૦ના રોજ એચડીએફસી સ્ટાન્ડર્ડ લાઇફ ઇન્સ્યુરન્સથી એક વિમા પોલીસી ખરીદી હતી. તેમણે પ્રિમિયમ તરીકે ૪પ૯૯૯ રૂ. ચુકવ્યા હતા.  એ જ વર્ષે રપ ઓગષ્ટના રોજ હાર્ટએટેકથી તેનુ મોત થયુ હતુ. પરિવારે જયારે વિમા કંપની પાસે કલેઇમ કર્યો તો કંપનીએ માત્ર પ્રિમિયમ જ પરત કર્યુ. જસ્ટીસ એસ.શ્રીશાની સીંગલ જ્જવાળી બેન્ચે ર૭મી જુન ર૦૧રના રોજ ઇરડા દ્વારા જારી આદેશનો હવાલો આપી વિમા કંપનીને પુરી રકમ આપવા કહ્યુ હતુ. ઇરડાનો એ આદેશ આ વિમા કંપની માટે પણ હતો.

રાષ્ટ્રીય ગ્રાહક પંચે કહ્યુ છે કે વિમા કંપનીઓ ૯૦ દિવસનો વેઇટીંગ પીરીયડ રાખી ન શકે તેના અવેજમાં કલેઇમને ફગાવી ન દઇ શકાય. ઇરડાએ આ કંપની પર ૯૦ દિવસના વેઇટીંગ પીરીયડની આડમાં ર૧ કલેઇમ રીજેકટ કરવા માટે ૧ કરોડનો દંડ પણ ઠોકયો હતો.