Gujarati News

વૉશિંગ્ટન, તા.૧૧ : ઝૂમ કોલ પર ત્રણ જ મિનિટમાં ૯૦૦ કર્મચારીઓની છટણી કરનાર અમેરિકન કંપનીના ભારતીય મૂળના સીઈઓ વિશાલ ગર્ગને હવે લાંબી રજા પર ઉતારી દેવાયા છે.

કર્મચારીઓની એક સાથે છટણી કરીને કંપની વિવાદમાં આવી ગઈ છે અને તેના પર માછલા ધોવાઈ રહ્યા છે.જેના પગલે કંપનીએ તેમને લાંબી રજા પર ઉતારવાનો નિર્ણય કર્યો છે.બેટર ડોટ કોમ નામની કંપનીના ઈન્ચાર્જ સીઈઓ તરીકે તેના ચીફ ફાઈનાન્સિયલ ઓફિસર કેવિન રાયનને જવાબદારી આપવામાં આવી છે.

બે દિવસ પહેલા  વિશાલ ગર્ગે પોતાની આ હરકત પર માફી માંગી હતી  અને કર્મચારીઓને પત્ર લખીને કહ્યુ હતું કે, તમને છુટા કરવા માટે જે પણ રસ્તો મેં અપનાવ્યો હતો તે ચોક્કસ ખોટો હતો. સીઈઓ ગર્ગે કહ્યુ હતુ કે, મારાથી મોટી ભૂલ થઈ છે .કંપનીમાં પોતાનુ અમૂલ્ય યોગદાન આપનારા કર્મચારીઓ માટે યોગ્ય સન્માન વ્યક્ત કરવામાં અને તેમનો આભાર માનવામાં હું નિષ્ફળ રહ્યો છું.કર્મચારીઓને છુટા કરવાના મારા નિર્ણય પર જોકે હું કાયમ છું પણ આ નિર્ણયનો જે રીતે મેં અમલ કર્યો તે ખોટો હતો.આવુ કરીને મે તમને શરમજનક સ્થિતિમાં મુકયા છે અને મને આ વાતનો અહેસાસ થયો છે.

ઉલ્લેખનીય છે કે, વિશાલ ગર્ગે તાજેતરમાં ઝૂમ કોલ પર કર્મચારીઓની મિટિંગ બોલાવી હતી અને એક સાથે ૯૦૦ કર્મચારીઓને કહ્યુ હતુ કે, તમને છુટા કરવામાં આવે છે.માત્ર ત્રણ મિનિટના વિડિયો કોલમાં વિશાલ વર્ગે પોતાનો નિર્ણય કર્મચારીઓ સમક્ષ જાહેર કર્યો હતો.જે અંગે કર્મચારીઓને અગાઉથી કોઈ જાણકારી પણ નહોતી.

ગર્ગની જાહેરાત સાંભળીને કર્મચારીઓ સ્તબ્ધ થઈ ગયા હતા અને કેટલાક તો ધ્રુસકેને ધ્રુસકે રડી રહ્યા હતા.એક કર્મચારીએ આ વિડિયો કોલ રેકોર્ડ કરીને સોશિયલ મીડિયા પર વાયરલ કરી દીધો હતો. અમેરિકામાં આ નિર્ણયની ટીકા એટલા માટે પણ થઈ રહી છે કે, ક્રિસમસના તહેવારો પહેલા કર્મચારીઓને છુટા કરવામાં આવ્યા છે.આ સમય અમેરિકામાં સેલિબ્રેશનનો હોય છે અને લોકો વેકેશન પર જવાની યોજનાઓ બનાવતા હોય છે.