Gujarati News

નવી દિલ્હી, તા.૧૦: ભારત અને ઇઝરાઇલે મળીને ભારતમાં કોરોનાવાયરસની સુપર રેપિડ ટેસ્ટની ગેમચેન્જર ટેકનોલજી તૈયાર કરવાની નજીક પહોંચી ગયા છે. ઝડપી પરીક્ષણ સંશોધન હવે અંતિમ તબક્કામાં છે અને થોડા દિવસોમાં તે સંપૂર્ણ રીતે તૈયાર થઈ જશે. એક મિનિટની ઓછા સમયની અંદર કોરોના પરીક્ષણનું પરિણામ જાહેર કરશે. ભારતમાં ઇઝરાઇલી રાજદૂત રોન માલ્કાએ પીટીઆઈને આપેલા એક ઇન્ટરવ્યુમાં આ માહિતી આપી હતી. તેમણે કહ્યું કે, આવનારા સમયમાં ભારત અને ઇઝરાઇલ વચ્ચે સંકલન માટે હેલ્થકેર મહત્વપૂર્ણ ક્ષેત્ર બની રહેશે.

ભારત અને ઈઝરાઇલ દ્વારા સંયુકત રીતે તૈયાર કરવામાં આવી રહેલ આ ઝડપી પરીક્ષણ તકનીક એક મિનિટમાં જ જણાવી શકશે કે વ્યકિતને કોરોના ચેપ છે કે નહીં. આ માટે, પરીક્ષણ હાથ ધરનાર વ્યકિતએ એક નળીમાં મોં દ્વારા ફૂંક મારવાની રહેશે. ભારતમાં ઇઝરાઇલી રાજદૂત રોન માલ્કાએ કહ્યું કે આનાથી ૩૦-૪૦-૫૦ સેકન્ડમાં પરિણામ મળશે. મલ્કાએ કહ્યું કે આખી દુનિયા માટે ખુશખબર છે. તેનો ઉપયોગ એરપોર્ટ અને અન્યત્ર થઈ શકે છે. આ સિવાય તેની કિંમત પણ ઘણી ઓછી છે, કારણ કે પરિણામ માટે નમૂનાઓ લેબમાં મોકલવાની જરૂર નથી અને ઝડપી પરિણામો મળશે.

ભારત અને ઇઝરાઇલે સંયુકત રીતે ૪ ટેસ્ટ ટેકનોલોજીનું પરીક્ષણ કર્યું છે. ભારતમાં આ પરીક્ષણો માટે મોટી સંખ્યામાં નમૂના લેવામાં આવ્યા હતા. આ તકનીકમાં બ્રેથ એનાલાઈઝર અને વોઈસ પરીક્ષણો પણ શામેલ છે. તેમની પાસે તાત્કાલિક કોરોના શોધવાની ક્ષમતા છે.

રસીને લઇને બંને દેશો વચ્ચે સહકારના પ્રશ્ન પર, મલ્કાએ કહ્યું કે બંને દેશો હંમેશાં એકબીજા સાથે સંશોધન અને ટેકનોલોજી વહેંચે છે. તેમણે કહ્યું કે અમે એકબીજાને સમર્થન આપી રહ્યા છીએ. ઇઝરાયલી રાજદૂતે કહ્યું કે ભારત પાસે કોરોના રસીનું કેન્દ્ર બનવાની તમામ સુવિધાઓ છે. તેમણે આશા વ્યકત કરી કે જયારે પણ વિશ્વસનીય, સલામત અને અસરકારક રસી ઉત્પન્ન થાય છે, ત્યારે તેનું મોટાભાગનું ઉત્પાદન ભારતમાં કરવામાં આવશે. મલ્કાએ કહ્યું કે જયારે પણ ભારત રસી બનાવે છે ત્યારે ઇઝરાઇલ તેની જરૂરિયાતોનું પણ ધ્યાન રાખશે.