Gujarati News

નવી દિલ્હી, તા. ૮ : દેશના જુદા જુદા ભાગોમાં ખેડુતોના ભારત બંધની જુદી જુદી અસર જોવા મળી છે. કેટલાક સ્થળોએ ટ્રાફિક ખોરવાયો હતો તો કેટલાક સ્થળોએ વિરોધીઓ અને પોલીસ વચ્ચે સામાન્ય અથડામણ થઈ હતી. ખેડૂત આગેવાનોએ જણાવ્યું હતું કે સવારે ૧૧ થી બપોરે ૩ વાગ્યા સુધી ચક્કા જામનો ઉદ્દેશ્ય એ છે કે સામાન્ય વ્યક્તિને મુશ્કેલી ન પડે. દિલ્હી-એનસીઆરમાં અમુક અંશે ટ્રાફિક પ્રભાવિત થયો હતો. કેટલાક ઓટો અને ટેક્સી એસોસિએશનોએ પણ મંગળવારે ભારત બંધમાં ભાગ લીધો હતો અને રસ્તાઓ પર વાહનો ન ઉતારવાનો નિર્ણય કર્યો હતો, જ્યારે કેટલાક હડતાલથી દૂર રહ્યા હતા. દરમિયાનમાં મુખ્યમંત્રી કેજરીવાલને નજરકેદ કરાયા હોવાના આરોપ સાથે આપે આઇટીઓ ખાતે ધરણા કર્યા હતા. ખેડૂતોએ નેશનલ હાઇવે -૨૪ બંધ કર્યો હતો. મંગળવારે સવારે ૧૧ વાગ્યે, ખેડુતોએ ગાઝિયાબાદ મેરઠ એક્સપ્રેસ વે પર ધરણા કર્યા હતા અને હાઈવે પરથી પસાર થતી ગાડીઓએ પરત ફરવાની ફરજ પડી હતી.

            જો કે, આ સમય દરમિયાન, એમ્બ્યુલન્સને ખેડૂતો દ્વારા જવાનો માર્ગ કરી અપાતો હતો. ઉત્તર પ્રદેશમાં સમાજવાદી પાર્ટીના કાર્યકરો રસ્તાઓ પર જોવા મળ્યા હતા. રાજ્યના અનેક જિલ્લાઓમાં સપાના કાર્યકરોએ ઉગ્ર પ્રદર્શન કર્યું હતું. કામદારોએ પ્રયાગરાજ ખાતેના રેલ્વે સ્ટેશનની બહાર બુંદેલખંડ એક્સપ્રેસ ટ્રેન અટકાવી હતી. તેવી જ રીતે ગ્વાલિયરથી મધુવાદિહ જતી ટ્રેનને પણ વચ્ચેથી અટકાવી દેવામાં આવી હતી. ટાઉનશીપમાં ભારત બંધના આંદોલનના સમર્થનમાં, દુકાનને બંધ કરવા માટે ગાંધીનગર પક્કે બજારમાં રેલી કાઢનારા સમર્થકો પર પોલીસે લાકડીઓ વિંઝી હતી.

ગોવા પર 'ભારત બંધ' ના આહવાનની કોઈ અસર નહોતી. ખાનગી અને સરકારી કચેરીઓ, બજારો અને જાહેર પરિવહન તમામ સામાન્ય રીતે કાર્યરત હતા. મધ્યપ્રદેશના અનેક ભાગોમાં વિરોધ પ્રદર્શનનો પ્રયાસ કરવામાં આવ્યો હતો. આ જ ક્રમમાં વિરોધીઓએ ગ્વાલિયરમાં કેન્દ્રીય કૃષિ મંત્રી નરેન્દ્રસિંહ તોમરના નિવાસ સ્થાને વિરોધનો પ્રયાસ કરાયો કર્યો. પોલીસે વિરોધ કરનારાઓની અટકાયત કરી હતી. આ જ ક્રમમાં કોંગ્રેસના કાર્યકરો અને ખેડૂત નેતાઓ રસ્તાઓ પર ઉતરી આવ્યા હતા. જો કે, ગ્વાલિયરના બજારો મંગળવારે બંધ રહતા હોઈ, મોટાભાગના બજારો બંધ રહ્યા હતા. પશ્ચિમ બંગાળમાં 'ભારત બંધ' ની આંશિક અસર જોવા મળી હતી. વિરોધ પ્રદર્શન કરનારાઓએ અહીં વડા પ્રધાન નરેન્દ્ર મોદી, મોટા ઉદ્યોગપતિઓ મુકેશ અંબાણી અને ગૌતમ અદાણીનાં પુતળાંનું દહન કર્યું હતું. વિરોધીઓએ લેક ટાઉન અને બાંગુર નજીક રસ્તો રોકી દીધો હતો. મંગળવારે બંધના સમર્થનમાં કોલકાતાના જાદવપુર ૮-બી બસ સ્ટેન્ડ વિસ્તારમાં પણ પશ્ચિમ બંગાળ સમર્થિત સંગઠનો એકઠા થયા હતા. કોલકાતાના કોલેજ સ્ટ્રીટ વિસ્તારમાં મંગળવારે સવારે આંદોલનકારીઓએ વિરોધ પ્રદર્શન કર્યું ત્યારે ટ્રામ અને બસ સેવાઓ પણ ખોરવાઈ હતી. તામિલનાડુમાં કોંગ્રેસ સહિત ડીએમકે અને તેના સાથી પક્ષોએ મંગળવારે ભારત બંધમાં ભાગ લીધો હતો. ડીએમકે, કોંગ્રેસે પણ પુડુચેરીમાં દેખાવો કર્યા. તમિળનાડુમાં જાહેર અને ખાનગી પરિવહનને ઓછી અસર થઈ હતી અને જીવન સામાન્ય હતું.

           જો કે વિરોધ સ્થળની આસપાસ ટ્રાફિક જામ હતો. ચેન્નાઈ, તિરુચિરાપલ્લી, થાંજાવર, કુડ્લોર સહિતના અનેક સ્થળોએ દેખાવો યોજાયા હતા. પ્રદર્શનની અસર પુડુચેરીમાં પણ જોવા મળી હતી. આ વિરોધ પ્રદર્શનમાં ખેડૂત સંગઠનો, ડીએમકે, કોંગ્રેસ, ડાબેરી પક્ષો અને અન્ય સાથીઓએ ભાગ લીધો હતો.  બંધની અસર કોંગ્રેસ શાસિત અને કેન્દ્ર શાસિત પ્રદેશો પુડુચેરીમાં જોવા મળી હતી. બસો, ટેક્સીઓ અને ઓટો રસ્તાઓ પર દેખાતા નહોતા. બંધના સમર્થનમાં દુકાનો અને વ્યવસાયિક મથકો બંધ રહ્યા હતા અને રાજ્ય સરકારની કચેરીઓમાં કર્મચારીઓની હાજરી પણ ઓછી હતી.  બંધની ત્રિપુરામાં કોઈ અસર જોવા મળી નહતી. રસ્તાઓ પર રાબેતા મુજબ વાહનો ચાલુ રહ્યા હતા અને રાજ્યમાં બજારો અને દુકાનો ખુલી રહી છે. કર્મચારીઓ સરકારી કચેરીઓ, બેંકો અને નાણાકીય સંસ્થાઓમાં સામાનય સ્થિતિ જોવા મળી હતી. પોલીસે કહ્યું કે રાજ્યના કોઈ પણ ભાગમાંથી હજી સુધી હિંસાના કોઈ અહેવાલ મળ્યા નથી. મંગળવારે મેઘાલયમાં જનજીવન સામાન્ય રહ્યું હતું અને કેન્દ્રના કૃષિ કાયદાના વિરોધમાં ખેડુતોની સંસ્થાઓ દ્વારા બોલાવવામાં આવેલા ભારત બંધનો કોઈ ખાસ પ્રભાવ પડ્યો ન હતો. રાજ્યમાં દુકાનો અને બજારો ખુલ્લા રહ્યા હતા અને ખાનગી અને જાહેર વાહનોનું સંચાલન ચાલુ રાખ્યું હતું.