Gujarati News

અજમેર,તા.૮: : એક બાજુ જયાં વિશ્વભરમાં મહિલા દિવસ ઉજવાઈ રહ્યો છે અને મહિલાઓના માન સન્માન અને ઈજ્જતને લઈને મોટા મોટા દાવાઓ કરવામાં આવી રહ્યા છે ત્યારે બીજી બાજુ અજમેરમાં ગુજરાતની યુવતીને કેટલાક નરાધમોએ પીંખી નાખી હતી. યુવતી પર દુષ્કર્મ આચરીને આરોપી તેને બેભાન અવસ્થામાં છોડીને જ ફરાર થયા હતાં. આ વાતનો ખુલાસો ત્યારે થયો જયારે પોલીસને પેટ્રોલિંગ દરમિયાન યુવતી બેભાન હાલતમાં મળી આવી હતી. યુવતીની હાલત જોઈને તેને તરત જ જેએલએન હોસ્પિટલમાં સારવાર હેઠળ ખસેડવામાં આવી હતી. હાલ તેમની સારવાર ચાલી રહી છે.

અજમેરના દક્ષિણ ડીએસપી મુકેશ સોનીએ જણાવ્યું કે રામગંજ પોલીસ રાતે પેટ્રોલિંગ કરી રહ્યા હતાં. આ દરમિયાન એક યુવતી બેભાન અવસ્થામાં મળી આવી હતી. જે પછી પોલીસ કર્મચારીઓએ ગંભીરતા જોતા તેમણે તરત જ જેએલએન હોસ્પિટલમાં સારવાર અર્થે ખસેડી હતી. જે પછી અલવર ગેટના અધિકારીઓએ પીડિતાના નિવેદન નોંધાયું જેમાં જણાવવામાં આવ્યું કે કોઈ સ્થાન પર લઈ જઈને તેમણે પોતાની હવસનો શિકાર બનાવ્યો હતો અને પછી તેમને બધું છોડીને ફરાર થઈ ગયા હતાં.

ડીએસપી સોનીએ જણાવ્યું કે પીડિતા ગુજરાતની રહેવાસી છે. હાલ તેને હોસ્પિટલમાં સારવાર હેઠળ ખસેડવામાં આવી છે. પીડિતાના નિવેદન પરથી આરોપીઓની ઉંડાણપૂર્વક તપાસ કરવામાં આવશે. આ ઘટનામાં કેસ દાખલ કરીને ઘટનાસ્થળની આસપાસના સીસીટીવી ફુટેજ પણ તપાસવામાં આવી રહ્યા છે.