Gujarati News

નવી દિલ્હી તા. ૭ : કોરોના રસી ખરીદીથી રાજ્યોને રાહત આપવાની સાથે જ કેન્દ્ર સરકારે હવે વેકસીનેશન પોલિસી અંગે ગાઇડલાઇન્સ બહાર પાડી છે. તેના હેઠળ કોરોના રસીની ફાળવણી અંગે અન્ય કેટલીક વસ્તુઓ અંગે સ્થિતિ સ્પષ્ટ કરવામાં આવી છે. નવી ગાઇડલાઇન્સ મુજબ રાજ્યોએ તેની વસ્તી, કોરોના સંક્રમણના પ્રસાર અને વેકસીનેશનની ગતિ અંગે રસીની ફાળવણી કરવામાં આવશે. આ ઉપરાંત એ પણ કહેવામાં આવ્યું છે કે રસીનું વેડફાવું એ પણ રસીની ફાળવણીમાં અસર કરે છે. કેન્દ્ર દ્વારા જાહેર કરવામાં આવેલી નવી ગાઇડલાઇન ૨૧ જુનથી લાગુ કરવામાં આવશે.

સરકાર દ્વારા જાહેર ગાઇડલાઇન્સમાં કહેવામાં આવ્યું છે કે હોસ્પિટલોમાં લાગતી કોરોના રસીના ભાવ કંપનીઓ તરફથી નક્કી કરવામાં આવશે. આ ઉપરાંત રાજ્યોને છૂટ આપવામાં આવી છે કે ૧૮ વર્ષથી વધુ ઉંમર ધરાવતા લોકોના રસીકરણના પ્રાયોરીટી ગ્રુપ તેઓ તેમના મુજબ નક્કી કરી શકે છે. નવી ગાઇડલાઇન્સ હેઠળ કેન્દ્ર સરકાર દ્વારા રાજ્યો માટે અપાતા રસીની એડવાન્સમાં જાણકારી આપવામાં આવશે ત્યારબાદ રાજ્યોને જિલ્લા પ્રશાસનને આ જાણકારી આપવી પડશે એટલું જ નહિ કયા જિલ્લાને કેટલી રસી ફાળવવામાં આવી છે તેની માહિતી પણ આપવી પડશે. સરકારે કહ્યું છે કે જિલ્લા પ્રશાસનને રસીની ઉપલબ્ધતા વિશે સામાન્ય લોકો સુધી જાણકારી પહોંચાડવી પડશે.