Gujarati News

નવી દિલ્હીઃ પેકેજ્ડ કન્ઝ્યુમર ગૂડ્ઝ ઉત્પાદક નેસ્લે ઇન્ડિયાએ જણાવ્યું છે કે, કંપની સ્વૈચ્છિક રીતે સેન્ટ્રલ ગૂડ્ઝ એન્ડ સર્વિસિસ ટેક્સ (CGST) હેઠળ ટ્રાન્ઝિશન રકમ કન્ઝ્યુમર વેલફેર ફંડમાં જમા કરાવવાની પ્રક્રિયા કરી રહી છે. સરકારે નવેમ્બર 2017માં ચોકોલેટ અને કોકો-આધારિત પ્રોડક્ટ્સ સહિતની દૈનિક વપરાશની 178 પ્રોડક્ટ્સ પર લાગતો GST 28 ટકાથી ઘટાડીને 18 ટકા કર્યો હતો, જેને પગલે કંપનીઓને ફાયદો થયો હતો અને આ લાભ ગ્રાહકોને આપવાનો હતો.

કિટકેટ ચોકલેટ, નેસકાફે કોફી અને મેગી નૂડલ્સ જેવી બ્રાન્ડ્સનું વેચાણ કરતી નેસ્લેના પ્રવક્તાએ ઇ-મેઇલ મારફતે જણાવ્યું હતું કે, જે પરિસ્થિતિઓમાં MRP (મહત્તમ વેચાણ કિંમત)માં ઘટાડો કરીને અથવા વજનમાં વધારો કરીને ગ્રાહકોને તાત્કાલિક લાભ નહોતો આપી શકાયો તેના માટેની રકમ અલગથી મૂકી દેવામાં આવી હતી અને તેને વેચાણમાં કે નફામાં સામેલ કરી નહોતી.

પ્રવક્તાએ જણાવ્યું હતું કે, GSTના નીચા ટેક્સથી જે લાભ થયો હતો તે ગ્રાહકોને નહીં આપવા બદલ અમને એન્ટિ-પ્રોફિટિયરિંગ ઓથોરિટી તરફથી કોઈ નોટિસ મળી નથી. અમારી વિનંતી બાદ ઓથોરિટીએ અમને અમારા દ્વારા ગણતરીમાં મૂકવામાં આવેલી રકમને કન્ઝ્યુમર વેલફેર ફંડમાં ધીમે ધીમે ડિપોઝિટ કરવાની સલાહ આપી હતી.

ઉલ્લેખનીય છે કે, ડાયરેક્ટરેટ જનરલ ઓફ સેફગાર્ડ્સ (DGS) GSTના નીચા રેટનો લાભ ગ્રાહકોને તાત્કાલિક નહીં આપનારી કંપનીઓનો સંપર્ક સાધીને તેમને આ લાભ ગ્રાહકોને આપવાની સૂચના આપી રહી છે. જે કિસ્સામાં નીચા રેટનો લાભ તાત્કાલિક આપી શકાય એમ ના હોય તેના માટે કંપનીઓએ સેન્ટ્રલ ફંડમાં આ ડિફરન્સની રકમ અલગથી મૂકવી જરૂરી છે.

નેસ્લેના પ્રવક્તાએ જણાવ્યું હતું કે, ગ્રાહકોને લાભ આપવા માટેનાં આગામી પગલાં અંગે અમે ચર્ચા કરતા હતા ત્યારે એન્ટિ-પ્રોફિટિયરિંગ ઓથોરિટી સાથે પણ ચર્ચા-વિચારણા કરી હતી, જેના ભાગરૂપે અલગથી રકમ ફાળવવાનું નક્કી કરવામાં આવ્યું હતું.

નીચા રેટનો લાભ ગ્રાહકોને નહીં આપવા બદલ HULને એન્ટિ-પ્રોફિટિયરિંગ ઓથોરિટી તરફથી નોટિસ આપવામાં આવી હતી, જેને પગલે જાન્યુઆરીમાં HULએ જણાવ્યું હતું કે, GST બેનિફિટ તરીકે કંપની ₹119 કરોડની રકમ સરકારના કન્ઝ્યુમર સેફગાર્ડ ફંડને ચૂકવશે. ગયા મહિને જુબિલન્ટ ફૂડવર્ક્સ (ડોમિનોઝ પિત્ઝા), હાર્ડકેસલ રેસ્ટોરન્ટ્સ (મેક્‌ડોનાલ્ડ્સ), લાઇફસ્ટાઇલ ઇન્ટનરેશનલ અને હીરો મોટરને પણ આવી નોટિસ મોકલવામાં આવી હતી.