Gujarati News

નવી દિલ્હી તા. ૫ : કેન્દ્રીય કર્મચારીઓ માટે દિવાળી પહેલા એક સારા સમાચાર આવશે સરકારે બે વર્ષથી બાકી રહેલુંમોંઘવારી ભથ્થું નથી આપ્યું. જોકે, હવે આ આશા પૂરી થતી જણાય છે. હવે ૧૮ મહિનાથી પેન્ડિંગ એરિયર્સનો મામલો પીએમ નરેન્દ્ર મોદી સુધી પહોંચ્યો છે. મીડિયા રિપોર્ટ્સ અનુસાર, પીએમ મોદી આ માટે શકય તેટલી વહેલી તકે ઉકેલ શોધી શકે છે. કેન્દ્રીય કર્મચારીઓ દિવાળી સુધી ૧૮ મહિના રોકાયેલ મોંઘવારી ભથ્થું મેળવી શકે છે.

ઇન્ડિયન પેન્શનર્સ ફોરમે પીએમ મોદીને કેન્દ્રીય કર્મચારીઓ અને પેન્શનરોને મોંઘવારી ભથ્થા અને મોંઘવારી રાહતની બાકી રકમ ચૂકવવા અપીલ કરી છે. મંચે પીએમ મોદીને પત્ર લખીને આ મામલામાં મદદ કરવાનું કહ્યું છે.

ઓફિસ મેમોરેન્ડમના નાણા મંત્રાલય અંતર્ગત ખર્ચ વિભાગે જણાવ્યું હતું કે કેન્દ્ર સરકારના કર્મચારીઓને મળતો ડીએ હાલના ૧૭ ટકાથી વધારીને મૂળ પગારના ૨૮ ટકા કરવામાં આવશે. ગયા વર્ષે એપ્રિલમાં નાણાં મંત્રાલયે કોવિડ ૧૯ રોગચાળાને કારણે ૩૦ જૂન ૨૦૨૧ સુધી મોંઘવારી ભથ્થા (DA) માં વધારો અટકાવ્યો હતો. ૧ જાન્યુઆરી ૨૦૨૦ થી ૩૦ જૂન ૨૦૨૧ સુધી ડીએ રેટ ૧૭ ટકા હતો.

નેશનલ કાઉન્સિલ ઓફ જેસીએમ સચિવ શિવ ગોપાલ મિશ્રાએ જણાવ્યું હતું કે દોઢ વર્ષનું એરીયર્સ હજુ આપવામાં આવ્યું નથી. અત્યારે આ અંગે સરકાર સાથે વાતચીત ચાલી રહી છે. તેમણે કહ્યું કે કર્મચારીઓની માંગને જોતા સરકાર એરીયર્સ આપે તેવી અપેક્ષા છે. આવો વચલો રસ્તો નીકળશે જેથી સરકારી અને કેન્દ્રીય કર્મચારીઓને મદદ મળી શકે.

મોદી સરકારે ૧ જુલાઈથી કેન્દ્ર સરકારના કર્મચારીઓ માટે મોંઘવારી ભથ્થામાં ૨૮ ટકાનો વધારો કર્યો છે. કેન્દ્રીય મંત્રીમંડળે ૧ જુલાઈથી કેન્દ્ર સરકારના કર્મચારીઓ અને પેન્શનરો માટે મોંઘવારી ભથ્થા અને મોંઘવારી રાહતમાં ૧૧ ટકાનો વધારો મંજૂર કર્યો હતો, જેનાથી ૪૮ લાખ કેન્દ્ર સરકારના કર્મચારીઓ અને ૬૫ લાખ પેન્શનરોને લાભ થયો હતો. હવે DAનો નવો દર ૧૭ ટકાથી વધીને ૨૮ ટકા થયો છે.