Gujarati News

રાંચી,તા. ૫: આજના જમાનામાં અનેક યુવતીઓ પ્રેમ લગ્ન માટે તરસતાં હોય છે. અમુક કિસ્સામાં પ્રેમ તો હોય છે, પણ નસીબ સાથ ન આપતાં તેમનાં લગ્ન થઈ શકતા નથી. પણ ઝારખંડમાંથી એક અનોખો કિસ્સો સામે આવ્યો છે. જેમાં એક પ્રેમીએ એક મંડપ નીચે એક નહીં પણ બે પ્રેમિકા સાથે લગ્ન કર્યાં હતા. અને વધુ ચોંકાવનારી વાત એ છે કે, આ સમયે તેમના ચાર બાળકો પણ માતા-પિતાના લગ્નમાં હાજર હતા. સમગ્ર પંથકમાં આ લગ્નએ ભારે ચકચાર મચાવી દીધી હતી.

ઝારખંડના લોહરદગા જિલ્લાના કિસ્કોમાં ચોરગાઈ ગામમાં સંજીવ ઉરાંવના અરેયા ગામની એક યુવતી રિંકી સાથે પ્રેમ સંબંધમાં હતો અને તેની સાથે લિવ ઈન રિલેશનશીપમાં રહેતો હતો. આ સંબંધ દરમિયાન બંનેને ૩ બાળકો પણ હતા. જેમાં બે દીકરી અને એક દીકરાનો સમાવેશ થાય છે. પણ તે બાદ સંજીવને હિસરી ગામની કલાવતી સાથે પ્રેમ થઈ ગયો હતો. અને તેની સાથે પણ સંજીવ લિવ ઈન રિલેશનશીપમાં રહેવા લાગ્યો હતો. અને કલાવતીને પણ એક દીકરીનો જન્મ થયો હતો.

સંજીવે બંને યુવતીઓ સાથે સંબંધને છૂપાવીને રાખ્યા હતા. પણ આખરે પાપ છાપરે ચઢીને પોકારે તેમ આ સંબંધોનો ખુલાસો થઈ ગયો હતો. જે બાદ રિંકી અને કલાવતી વચ્ચે સંજીવને લઈને ઝઘડાઓ શરૂ થઈ ગયા હતા. પણ સંજીવનું મન કલાવતી પર આવી ગયું હતું. તે રિંકીને છોડીને કલાવતી સાથે લગ્ન કરવા માગતો હતો. પણ રિંકી સંજીવને છોડવા માગતી ન હતી. બંને યુવતીઓએ સંજીવને પતિ માની તેની સાથે જ જીવન પસાર કરવા માગતી હતી

પ્રણય ત્રિકોણનો આ મામલો ખુબ જ પેચીદો બનતાં પંચાયત અને પોલીસ સુધી પહોંચ્યો હતો. પણ આ મામલે કોઈ ઉકેલ આવી શકયો ન હતો. અને આખરે સંજીવ અને રિંકી તેમજ કલાવતીના પરિવારો ભેગાં મળ્યા હતા અને ત્રણેય પરિવારો વચ્ચે સહમતિ સધાતા સંજીવના રિંકી અને કલાવતી સાથે લગ્ન થયા હતા.