Gujarati News

નવી દિલ્હી તા. ૪ : લોકસભાના છઠ્ઠા ચરણનું મતદાન ૧૨મી મેનાં રોજ યોજવામાં આવનાર છે જેમાં ૭ રાજયોની ૫૯ સીટ માટે ૯૭૯ ઉમેદવારો મેદાનમાં છે. આમાંથી ૧૮૯ એટલે કે ૨૦ ટકા ઉમેદવારો સામે ક્રિમિનલ કેસ કરવામાં આવેલા છે. ૧૪૬ એટલે કે ૧૫ ટકા ઉમેદવારો સામે ગંભીર કેસ કરાયા છે.

આ તબક્કામાં ૩૧૧ એટલે કે ૩૨ ટકા ઉમેદવારો કરોડપતિ છે. જેમાં મધ્યપ્રદેશની ગુના લોકસભા સીટનાં કોંગ્રેસનાં ઉમેદવાર જયોતિરાદિત્ય સિંધિયા પાસે સૌથી વધુ રૂ. ૩૭૪ કરોડની સંપત્તિ છે.

એસોસિયેશન ફોર ડેમોક્રેટિક રિફોર્મ્સ (ADR)નાં રિપોર્ટમાં આ બાબતો ધ્યાનમાં આવી છે. એડીઆર દ્વારા ૯૭૯માંથી ૯૬૭ ઉમેદવારોની એફિડેવિટનો અભ્યાસ કરાયો હતો. કુલ ઉમેદવારમાંથી ૨૧ એવા છે કે જેમની સામે મહિલાઓ પર અત્યાચારને લગતા કેસ કરાયા છે. જયારે ૨૧માંથી બે સામે બળાત્કારનાં કેસ કરાયા છે.(૨૧.૫)