Gujarati News

નવી દિલ્હી, તા.૩ : અલીગઢ મુસ્લિમ યુનિવર્સિટીના અરબી વિભાગના પ્રોફેસર અબૂ સુફીયાન વાઇસ ચાન્સેલરની પરવાનગી વગર જ પાકિસ્તાન પહોંચી ગયા હતા. આ સમગ્ર મામલો અલીગઢ મુસ્લિમ યુનિવર્સિટીના અરબી વિભાગનો છે. આ ઘટનાની જાણ થતા જ કુલપતિએ વિભાગના બેદરકારી દાખવનાર અરબી વિભાગના ક્લાર્ક હસ્મત ખાનને સસ્પેન્ડ કરી દીધા છે. જ્યારે પ્રોફેસરને કારણ બતાવો નોટિસ પણ આપવામાં આવી છે. જ્યારે આ ઘટનાની જાણ અલીગઢ મુસ્લિમ યુનિવર્સિટીને કરવામાં આવી તો તેઓએ કહ્યું કે, આ મામલો ધ્યાનમાં આવ્યો છે. તપાસ થઈ રહી છે, તપાસ બાદ જ આગોતરા પગલાં લેવાશે. અરેબિક વિભાગના પ્રોફેસર અબુ સુફિયાનના પુત્ર હમઝા સુફિયાન પણ એઆઈએમઆઈએમ પાર્ટીના નેતા છે.

પ્રોફેસર વસીમ અલીએ કહ્યું કે, એએમયુ એ જણાવ્યુ કે, યુનિવર્સિટીનો નિયમ છે કે, વિદેશ જવા માટે પહેલા પરવાનગી લેવામાં આવે છે. પ્રોફેસર અબુએ દોઢ મહિના પહેલા રજીસ્ટ્રારને પાકિસ્તાન જવા માટે પ્રાર્થના પત્ર આપ્યો હતો પરંતુ પરવાનગી ન મળતાં તે પાકિસ્તાન ગયા અને થોડા દિવસ વિતાવી ભારત પાછા પણ ફર્યા.