Gujarati News

અખાત્રીજનો દિવસ લગ્નો અને અન્‍ય માંગલીક કામો માટે સૌથી શુભ માનવામાં આવે છે. આ અવસર ઉપર સમગ્ર દેશમાં મોટી સંખ્‍યામાં માંગલીક કાર્યો થાય છે પરંતુ ચૌથ કા બરવાળા સહિત તેના સાથે જોડાયેલા ૧૮ ગામમાં આ દિવસે કોઇ પણ પ્રકારનું માંગલીક કાર્ય થતુ નથી. લોકોના ઘરમાં શાકભાજી પણ બનતા નથી. વર્ષોથી ચાલી આવતી આ પરંપરા આજે પણ કાયમ છે. જો આ દિવસોમાં કોઇ લગ્નો યોજાય છે તો જાન એક દિવસ પહેલા અથવા એક દિવસ બાદ  જાય છે. અખાત્રીજના દિવસે સમગ્ર વિસ્‍તારમાં સન્નાટો વ્‍યાપેલો હોય છે.

કારણ શું ?

અક્ષય તૃતીયા એટલે કે અખાત્રીજના દિવસે માંગલીક પ્રસંગો નહિ પરંતુ શોક મનાવવાની પરંપરા અંગે ઇતિહાસકારો અને જાણકારોનું કહેવું છે કે ચૌથ માતા મંદિરમાં સેંકડો વર્ષ પહેલા નવવિવાહીત દુલ્‍હા-દુલ્‍હન મોટી સંખ્‍યામાં દર્શન માટે આવ્‍યા હતા. આ વખતે યુગલોની જોડી અંદરો-અંદર બદલાઇ ગઇ હતી. તેથી ગેરસમજણમાં મોટો હંગામો સર્જાયો હતો. આ દરમિયાન મારપીટ અને ખુન-ખરાબા થયા હતા. કેટલાય યુગલો મોતને ભેટયા હતા. જેના પાળીયા આજે પણ ખંઢેર અવસ્‍થામાં ચૌથ માતા ખાતાલાબના જંગલોમાં મોજુદ છે માટે આ દિવસોમાં આસપાસના ૧૮ ગામોમાં શોક મનાવાય છે. અખાત્રીજા દિવસે કોઇ શહેનાઇ વાગતી નથી કે જાન આવતી નથી! ઉલ્લેખનીય છે કે, આ દિવસે મંદિરનો ઘંટ પણ ભુલથી કોઇ વગાડે નહી તે માટે આગલા દિવસે જ બાંધી દેવામાં આવે છે.