Gujarati News

પુણે: ખતરનાક અકસ્માતોને કારણે બદનામ મુંબઈ-પુણે એક્સપ્રેસ હાઈવે પર વધુ એક ગમખ્વાર અકસ્માત થયો છે. ખોપોલી નજીક થયેલા આ અકસ્માતમાં પૂરપાટ ઝડપે દોડી રહેલી SUV ગાડી છ વાર પલ્ટી મારી ગઈ હતી. આ ઘટનામાં બે લોકોના મોત થયા છે, જ્યારે ત્રણ લોકો ઘાયલ થયા છે. આ લખાય છે ત્યાં સુધી પોલીસ અકસ્માતનો ભોગ બનનારાઓની ઓળખ નહોતી કરી શકી.

આ ગાડી પુણે નજીક આવેલા પિંપરી ચિંચવાડમાં રજિસ્ટર થયેલી છે. પોલીસના જણાવ્યા અનુસાર, ગાડીનું ટાયર ફાટવાના કારણે આ અકસ્માત થયાની શક્યતા છે. સ્પીડ વધુ હોવાના કારણે હાઈવે પર જ ગાડી છ વાર પલ્ટી મારી ગઈ હતી, અને બ્રિજની દીવાલને અથડાઈ હતી.

અકસ્માતને કારણે વાહનોથી ધમધમતા રહેતા આ હાઈવે પર ટ્રાફિકજામ થઈ ગયો હતો. પોલીસે પ્રત્યક્ષદર્શીઓના હવાલેથી કહ્યું હતું કે, દીવાલને અથડાતા પહેલા ગાડી પાંચથી છ વાર પલ્ટી મારી હતી. અકસ્માતને કારણે કારમાં સવાર બે લોકો બહાર ફંગોળાઈ ગયા હતા અને તેમનું મોત થયું હતું, જ્યારે ડ્રાઈવર સહિત ત્રણ લોકોની હાલત ગંભીર છે.