Gujarati News

નવી દિલ્હી :દિલ્હીમાં MCD ચૂંટણીની તારીખ ખૂબ નજીક છે. આ અંગે તમામ પક્ષોએ કમર કસી લીધી છે. કેન્દ્રમાં સત્તારૂઢ ભાજપે MCD ચૂંટણી માટે પોતાનો એક્શન પ્લાન તૈયાર કરી લીધો છે. ભાજપ છેલ્લા 15 વર્ષથી MCDની સત્તા ચલાવી રહી છે અને આ વખતે પણ MCDની ચૂંટણી જીતવામાં કોઈ કસર છોડવા માંગતી નથી.

આ વખતે ભાજપની સ્પર્ધા માત્ર કોંગ્રેસ સાથે જ નથી, પરંતુ આ વખતે આમ આદમી પાર્ટી પણ મેદાનમાં મક્કમતાથી ઉભી છે. આ જ કારણ છે કે ભાજપ કેજરીવાલ સરકાર અને આમ આદમી પાર્ટી સામે પોતાની રણનીતિમાં કોઈ કમી રાખવા માંગતી નથી

MCD ચૂંટણીને ધ્યાનમાં રાખીને 2 નવેમ્બરે MCD ચૂંટણી પહેલા બીજેપી દિલ્હીમાં એક મોટું અભિયાન શરૂ કરવા જઈ રહી છે અને આ અભિયાનનું નામ છે “નમો સાયબર યોદ્ધા”. આ ઝુંબેશ દ્વારા, ડિજિટલ પ્લેટફોર્મ અને ઓનલાઈન માધ્યમો દ્વારા, કાર્યકરો ભાજપને ચૂંટણી જીતવા માટે પ્રયાસ કરશે. ભાજપના રાષ્ટ્રીય પ્રવક્તા શહજાદ પૂનાવાલા આ કાર્યક્રમનું નેતૃત્વ કરી રહ્યા છે અને તેઓ આ અભિયાન હેઠળ 50 હજાર લોકોને યોદ્ધાઓની જેમ પોતાની સાથે જોડશે.

ભાજપના રાષ્ટ્રીય પ્રવક્તા શહજાદ પૂનાવાલાએ દાવો કર્યો હતો કે નમો સાયબર યોદ્ધા ઓનલાઈન સ્વયંસેવકોની સેના બનશે જે દિલ્હીમાં AAPના ખોટા કાર્યોને બહાર લાવવામાં મદદ કરશે. આ અભિયાનમાં જોડાવા માટે ભાજપ દ્વારા ઓનલાઈન લિંક પણ જારી કરવામાં આવી છે.