Gujarati News

મુંબઇ, તા. ૧,  મિત્રો. નરેન્દ્રભાઇ મોદીનો આ ફેવરીટ શબ્દ છે અને એ હવે જગજાહેર પણ છે કે નરેન્દ્રભાઇ મોદી પોતાની સ્પીચમાં આ શબ્દનો ઉલ્લેખ વારંવાર કરે છે. નોટબંધી સમયે પણ તેમણે આ શબ્દનો ઉપયોગ કર્યો હતો અને એ પછી તો મોદીનું 'મિત્રો' અતિશય લોકપ્રિય થઇ ગયું હતું અને સોશ્યલ મીડિયાથી માંડીને મિમિક્રી આર્ટિસ્ટોમાં પણ ખૂબ પોપ્યુલર થઇ ગયું હતું. જોકે હવે નરેન્દ્રભાઇ મોદીએ પોતાના આ સુપ્રસિદ્ધ શબ્દને તિલાંજલિ આપી દીધી છે અને 'મિત્રો'ને બદલે તેમણે 'સાથીઓ' બોલવાનું આરંભી દીધું છે. ગઇકાલે સરદાર પટેલના સ્ટેચ્યુના અનાવરણ પહેલા નરેન્દ્રભાઇ મોદીએ આપેલી સ્પીચમાં તે એક પણ વખત આ 'મિત્રો' શબ્દ બોલ્યા નહીં. એને બદલે તેમણે ૧૬ વખત 'સાથીઓ' શબ્દનો પ્રયોગ કર્યો હતો, જેને લીધે મોટા ભાગના લોકોને અજુગતું પણ લાગ્યું હતું તો કેટલાકને તો નરેન્દ્રભાઇ મોદીના આ ફેવરિટ શબ્દ 'મિત્રો' વિનાની તેમની સ્પીચ સાંભળવાની મજા પણ નહોતી આવી. (૮.૪)