Gujarati News

નવી દિલ્હીઃ તાજેતરમાં જ ઓસ્ટ્રેલિયાની એક લોન્જરી ફેશન બ્રાન્ડે ઉંધી બિકીનીનો ટ્રેન્ડ શરુ કર્યો હતો. આ પછી ફોર્મલ શર્ટને લઈને પણ અનોખો ટ્રેન્ડ જોવા મળ્યો હતો. હવે એક નવો ટ્રેન્ડ સોશિયલ મીડિયા પર વાઈરલ થઈ રહ્યો છે. જેમાં એક બ્રાન્ડે જીન્સને ઉંધી રીતે ડિઝાઈન કર્યું છે.

આ જીન્સમાં ખિસ્સા નીચેની તરફ આપવામાં આવેલા છે એટલે કે ખિસ્સા એડી પાસે આપવામાં આવ્યાં છે. સોશિયલ મીડિયામાં આ જીન્સની ડિઝાઈન છવાયેલી છે. આ જોવામાં ખૂબ જ વિચિત્ર લાગે છે.

એક વેબસાઈટના જણાવ્યાનુસાર ન્યૂયોર્કમાં સીઆઈઆઈ ડેનિમ નામની એક બ્રાન્ડે આ જીન્સ તૈયાર કર્યું છે. આ હાઈ રાઈઝ જીન્સની ડિઝાઈન ઉલટી રાખવામાં આવી છે. જેમાં બેલ્ટ અને ખિસ્સા કમરની બદલે એડી તરફ રાખવામાં આવ્યું છે.

એક રિપોર્ટ અનુસાર આ વિચિત્ર ડિઝાઈન અમેરિકન હોરર વેબ ટીવી સીરિઝ ‘સ્ટ્રેન્જર થિંગ્સ’થી લેવામાં આવી છે. જેને કેટલાક લોકો ઈન્વર્ટેડ અને અપસાઈડ ડાઉન ડેનિમ જીન્સ પણ કહે છે. કંપનીએ આ જીન્સને વિલ નામ આપ્યું છે.

ભલે તમને આ ફેશન અનોખી અને વિચિત્ર લાગતી હોય પરંતુ તેની કિંમત સાંભળી તમે દંગ રહી જશો. આ કેટેગરીમાં ફૂલ જીન્સ સાથે શોર્ટ ટોપનો પણ સમાવેશ થાય છે. ફુલ ડેનિમ જીન્સની કિંમત 495 ડોલર એટલે કે 33,905 રુપિયા છે. જ્યારે અપસાઈડ ડાઉન શોર્ટ્સની કિંમત 385 ડોલર એટલે કે આશરે 26,370 રુપિયા જેટલી છે.