Gujarati News

નવી દિલ્હી: દક્ષિણ અમેરિકાના દેશ ગયાનામાં આવેલી ગર્લ્સ હોસ્ટેલમાં રવિવારે મોડી રાત્રે આગ ફાટી નીકળી હતી. એએફપીના જણાવ્યા અનુસાર આ અકસ્માતમાં 20 વિદ્યાર્થીનીઓના મોત થયા છે. જોકે આ આંકડો વધી શકે છે. ઘણા લોકો ઘાયલ થયા હોવાના પણ અહેવાલ છે. આગ લાગવાનું કારણ હાલ બહાર આવ્યું નથી. સ્થાનિક મીડિયા અનુસાર, મધ્ય ગુયાનાના મહિદા શહેરમાં એક સ્કૂલ હોસ્ટેલમાં આગ લાગી હતી. અકસ્માત સમયે વિદ્યાર્થીનીઓ સૂતી હતી. ઘટનાસ્થળે હાજર અધિકારીઓના જણાવ્યા અનુસાર હજુ પણ ઘણી વિદ્યાર્થિનીઓ અંદર ફસાયેલી છે. અકસ્માતની કેટલીક તસવીરો અને વીડિયો સોશિયલ મીડિયા પર વાયરલ થઈ રહ્યા છે. તેમાં જોઈ શકાય છે કે ફાયર બ્રિગેડની ગાડીઓ અને એમ્બ્યુલન્સ સ્થળ પર હાજર છે. ઘાયલોને સારવાર માટે હોસ્પિટલમાં લઈ જવામાં આવી રહ્યા છે. ગયાનાના રાષ્ટ્રપતિ ઈરફાન અલીએ તેને ભયાનક અને દર્દનાક અકસ્માત ગણાવ્યો છે. તેમણે કહ્યું- ખરાબ હવામાનને કારણે બચાવ કાર્યમાં મુશ્કેલી આવી રહી છે. અમે હોસ્ટેલમાં ફસાયેલા લોકોને વહેલી તકે બહાર કાઢવાનો પ્રયાસ કરી રહ્યા છીએ.