Gujarati News

રિયો ડી જેનેરો, બ્રાઝીલઃ બ્રાઝીલના રંગારંગ શહેર રિયો ડી જેનેરોમાં દુનિયાનું સૌથી ઊંચું ક્રિસમસ ટ્રી તરતું મુકવામાં આવ્યું છે. મ્યુઝિકલ શો, રોશની અને આતશબાજી સાથે આ સૌથી ઊંચા અને તરતા ક્રિસમસ ટ્રીનું ભવ્ય ઉદ્ઘાટન કરાયું હતું. આ સાથે જ ક્રિસમસના તહેવારોની શરૂઆત થઈ ગઈ છે. આ ક્રિસમસ ટ્રી 6 ડિસેમ્બર, 2020 સુધી તરતું રહેશે.

એફે ન્યૂઝના રિપોર્ટ અનુસાર, ચમકદાર ધાતુથી બનેલા આ 230 ફૂટ ઊંચા ક્રિસમસ ટ્રીને શનિવારે રોડ્રિગો ડી ફ્રીટાસ લેગુન ખાતે જુદા-જુદા પ્રકારની રંગબેરંગી રોશનીથી પ્રજ્વલિત કરાયું હતું. રિયો ડી જેનેરોના દક્ષિણ વિસ્તારમાં આ સૌથી પ્રતિષ્ઠિત સ્થળ છે. આ ક્રિસમસ ટ્રીના ઉદ્ઘાટન સમારોહમાં અસંખ્ય દર્શકો હાજર રહ્યા હતા.

લગભગ 24 માળની ઈમારત જેટલી ઊંચાઈ ધરાવતું આ વિશાળ ક્રિસમસ ટ્રી પાણીમાં તરતા 11 પ્લેટફોર્મ પર ઊભું છે. તેને 9 લાખથી વધુ LED બલ્બથી શણગારવામાં આવ્યું છે. વર્ષ 1996માં સ્થાપના થયા બાદથી આ શહેર પ્રવાસન માટેનું સૌથી આકર્ષક સ્થળમાંનું એક ગણાય છે.