Gujarati News

નવી દિલ્હી: આમ તો ઉંઘ બધાને આવે છે પરંતુ કઝાકિસ્તાનની રાજધાની અસ્તાનથી ૨૭૬ કીમી દૂર આવેલા કલાચી ગામના લોકોને અચાનક જ ઉંઘ આવવા લાગે છે. એટલું જ નહી ઉંઘ આવે ત્યારે સમય કે સ્થળનું ભાન રહેતું નથી.સ્કુલમાં ગયેલા છોકરાઓ હોય કે કામ પર ગયેલા પુરૃષો રસ્તામાં જ સુઇ ગયા હોવાના દાખલા બને છે. બે મિત્રો વહેલી સવારે છાપું વાંચતા કે નાસ્તો કરતા કરતા પણ નસકોરા બોલાવવા લાગે છે. ગામની એક મહિલા ઘરના પગથિયા ચડતી હતી ત્યારે અચાનક જ બેસીને ઉંઘવા લાગી હતી. નવાઇની વાત તો એ છે કે આ થાકના લીધે આવી ગયેલું નાનકડું ઝોકું નહી પરંતુ ઢોલ નગારા વગાડો તો પણ ઉઠે નહી તેવી ઉંઘ હોય છે.

              કઝાકિસ્તાન એક સમયે સોવિયત સંઘનો જ એક ભાગ હતું ત્યારે આ ગામમાં યુરેનિયમ મેળવવા માટે ખોદકામ કરવામાં આવેલું તેને સ્થાનિક લોકો આ બિમારી માટે જવાબદાર ગણે છે પરંતુ યુરેનિયમની ખાણમાં કામ કરનારા વર્કરો પર તેની કોઇ જ અસર નથી.આથી આ રહસ્ય વધુ ગુંચવાયું છે. કેટલાક ખાણમાંથી આવતી હવા અને ધુમાડાને પણ આ બીમારી માટે જવાબદાર ગણાવે છે. જો કે બે લોકો સાથે જતા હોય એમાં એક ને જ અચાનક ઉંઘ આવી ગઇ હોય એવા કિસ્સા બનેલા હોવાથી આ કારણ પણ ફિટ બેસતું નથી.