Gujarati News

નવી દિલ્હી: સ્વિડનના ઓરેબ્રો ખાતે સ્કાયડાઈવર્સને લઈને જતું એક નાનકડું વિમાન તૂટી પડતાં નવ લોકોના મોત થયા છે. આ વિમાનમાં સવાર પાઈલટ તેમજ અન્ય આઠ પેસેન્જર્સના મૃત્યુની પુષ્ટિ પોલીસે કરી છે. સ્વિડિશ મેરિટાઈમ એડમિનિસ્ટ્રેશનના પ્રવક્તા કાર્લ-જોહાન લિન્ડેના મતે પ્લેનના ટેક ઓફ દરમિયાન તે ક્રેશ થયું હોવાનું અનુમાન છે.

ઘટનાસ્થળે તપાસ માટે એક ટીમ રવાના કરવામાં આવી છે. ઉલ્લેખનીય છે કે ઓરેબ્રો સ્ટોકહોમથી પશ્વિમે 164 કિ.મી. અંતરે આવેલું છે. જો કે દુર્ઘટના અંગે વધુ વિગતો પ્રાપ્ત થઈ નથી અને પોલીસે શુક્રવારે આ સંદર્ભે એક પ્રેસ કોન્ફરન્સ યોજવાનું જણાવ્યું છે.પોલીસના મતે આ અકસ્માતની તપાસ મુશ્કેલભર્યું કામ છે અને તેમાં થોડો સમય લાગી શકે છે. પોલીસે મૃતકોના નામ આપવાનો ઈનકાર કરી દીધો હતો તેમજ પ્લેન તૂટવાનું કારણ પણ આપ્યું નહતું.