Gujarati News

લંડન: આઈફોન યુઝ કરનારા વધારે સુખી હોય છે કે પછી એન્ડ્રોઈડ ફોન યુઝર્સ? આઈફોન અને એન્ડ્રોઈડ યુઝર્સ વચ્ચે વર્ષોથી સરખામણી થતી આવી છે. જોકે, હાલમાં થયેલા એક રિસર્ચમાં કંઈક એવું સામે આવ્યું છે કે જે કદાચ એન્ડ્રોઈડ ફોન વાપરતા લોકોને પસંદ નહીં પડે.

બે હજાર લોકો પર થયો સરવે

આ સરવેમાં 1000 આઈફોન યુઝર્સ અને 1000 એન્ડ્રોઈડ યુઝર્સને આવરી લેવાયા હતા. તેમાં તેમની પૈસા વાપરવાની આદત, લાઈફસ્ટાઈલ ચોઈસ તેમજ સોશિયલ બિહેવિયરનો પણ અભ્યાસ કરાયો હતો. તેના જે પરિણામ આવ્યા તેમાં એન્ડ્રોઈન અને આઈફોન યુઝર્સ વચ્ચેનો ફરક ઉડીને આંખે વળગે તેવો હતો.

આઈફોનવાળા વધુ કમાય છે!

એક વાત બંને ફોન્સના યુઝરમાં કોમન જોવા મળી હતી કે તેઓ પોતાના ફોન સાથે એક સરખો જ સમય વિતાવે છે. જોકે, એન્ડ્રોઈડ ફોન વાપરનારા કરતા આઈફોન વાપરતા લોકો વધારે કમાય છે, અને પૈસા પણ વધારે વાપરે છે. એટલું જ નહીં, આઈફોન યુઝર્સના ફ્રેન્ડ્સ પણ વધારે હોય છે અને તેઓ વેકેશન પર વધુ જાય છે, તેમજ સેલ્ફી પણ એન્ડ્રોઈડ યુઝર કરતા વધુ લે છે.

આઈફોનવાળા દિવસમાં 5 કલાક ફોનમાં ઘૂસેલા રહે છે!

નવાઈની વાત એ છે કે, એન્ડ્રોઈડ અને આઈફોન એમ બંને ફોનના યુઝર્સ પોતાના દિવસનો 25 ટકા ભાગ માત્ર ફોન જોવામાં જ કાઢી નાખે છે. સરેરાશ ગણીએ તો, આઈફોન યુઝર્સ દિવસના 4 કલાક 54 મિનિટ ફોન જોવામાં કાઢે છે, જ્યારે એન્ડ્રોઈડ ફોન ધરાવતા લોકો રોજ 3 કલાક 42 મિનિટ ફોનને જોવામાં વિતાવે છે.

એન્ડ્રોઈડવાળા કરતા આઈફોનવાળા વધુ ઉડાઉ

આ સરવે તો એવું પણ કહે છે કે, આઈફોન વાપરનારા લોકો એન્ડ્રોઈડ ફોન વાપરનારા લોકો કરતા વધારે કમાય છે, અને આઈફોનવાળા કપડા પર સૌથી વધારે રુપિયા ખર્ચે છે. નવાઈની વાત એ છે કે, એન્ડ્રોઈડ કરતા આઈફોન વાપરનારા લોકોનો ખર્ચો લગભગ ડબલ હોય છે.

એન્ડ્રોઈડવાળા પહેલા ડિસ્કાઉન્ટ શોધે છે!

આઈફોન યુઝર્સ શોપિંગ પર જાય ત્યારે ડિસ્કાઉન્ટમાં શું મળે છે તે પહેલા ચેક કરે છે. જ્યારે, આઈફોન યુઝર્સ પોતાની પર્સનાલિટી સારી પડે તે માટેની વસ્તુઓ જેવી કે કપડાં, જુતા પાછળ ખર્ચ કરવામાં જરાય પાછા નથી પડતા. આ સરવે યુકેની એક ઓનલાઈન કસિનો વેબસાઈટ દ્વારા કરવામાં આવ્યો હતો. જેમાં 2000 લોકોએ ભાગ લીધો હતો. સરવેમાં જાણવા મળ્યું હતું કે, લગભગ સ્માર્ટફોન વાપરનારાઓમાં અડધોઅડધ તેના બંધાણી બની ચૂક્યા છે.