Gujarati News

અમદાવાદઃ રાજ્યમાં પ્રાદેશિક કનેક્ટિવિટી અને ટુરિઝમને વધારે પ્રોત્સાહન આપવા ચાર સ્થળોએ સીપ્લેન સેવા શરૂ કરાશે જેમાં સરદાર સરોવર ડેમ, સાબરમતી રિવરફ્રન્ટ અમદાવાદ, ધરોઈ ડેમ મહેસાણા અને ભાવનગરના શત્રુંજય ડેમનો સમાવેશ થાય છે. નાગરિક અને ઉડ્ડયન મંત્રાલયના ડેટા મુજબ દેશના 14 વોટરડ્રોમમાં આ ચારનો સમાવેશ થાય છે અને UDAN સ્કિમ હેઠળ પ્રાદેશિક કનેક્ટિવિટી માટે ત્રીજા રાઉન્ડની બિડિંગ શામેલ છે.

 આ સ્થાનોને સ્કીમ હેઠળ સીપ્લેનની સુવિધા મળશે, જે ટુરિઝમ વિભાગ માટે મેજર બુસ્ટ સમાન હશે. એરપોર્ટ ઓથોરિટી ઓફ ઈન્ડિયાના ટોચના અધિકારીઓએ કહ્યું કે આ વોડરડ્રોમ માટેની બિડિંગ પ્રોસેસ ચાલી રહી છે અને જાન્યુઆરી સુધીમાં તે સમાપ્ત થઈ જશે. જેમાંથી સાબરમતિ રિવરફ્રન્ટ અને સરદાર સરોવર ડેમ માટે ત્રણ કંપનીઓએ બીડિંગ કરી નાખ્યું છે. સૂત્રોએ જણાવ્યું કે સીપ્લેન શરૂ કરવા માટેની સુવિધાઓ સ્થાપિત કરવા માટે ગુજરાત સરકાર, એરપોર્ટ ઓથોરિટી અને નાગરિક ઉડ્ડયન મંત્રાલય વચ્ચે મેમોરેન્ડમનું આદાન પ્રદાન થયું છે.
  એરપોર્ટ ઓથોરિટી ઓફ ઈન્ડિયાના ચેરમેન ગુરુપ્રસાદ મહાપાત્રાએ કહ્યું કે, શરૂઆતના અભ્યાસમાં બેઝિક ઈન્ફ્રાસ્ટ્રક્ચર જેવા કે જેટ્ટી, અરાઈવલ અને ડિપાર્ચર એરિયા, ઓફિસ સ્પેસ, સિક્યોરિટી ચેકપોઈન્ટ વગેરે માટે 15 કરોડના ખર્ચના અંદાજ છે. ત્યાર બાદ 7 અને 9 સીટર ટ્વીનલાઈન એરક્રાફ્ટ કોઈપણ એરલાઈન્સ દ્વારા સીપ્લેન રૂટથી શરૂ થઈ શકશે.
  સૂત્રોએ જણાવ્યું કે, ઈન્ફ્રાસ્ટ્રક્ચર માટે AAIએ ફંડિગ પ્રોવાઈડ કર્યું છે. આ જગ્યાઓ પર ચાર મહિના પર જ અભ્યાસ થઈ ચૂક્યો છે. એકવાર બિડર્સ ફાઈનલ થઈ જશે એટકે સીપ્લેન સર્વિસ શરૂ કરવામાં 6 મહિનાનો સમય લાગશે. આ રૂટ્સ પર સીપ્લેનને ટેકઓફ અને લેન્ડીંગની મંજૂરી નજીકના એરપોર્ટ પરથી આપવામાં આવશે. જાણકારી મુજબ રિવરફ્રન્ટ અને ધરોઈ ડેમના રૂટની મંજૂરી અમદાવાદ એરપોર્ટ પરથી અપાશે. જ્યારે સ્ટેચ્યુ ઓફ યુનિટીના રૂટ પર વડોદરાથી અને શત્રુંજય ડેમ માટે ભાવનગરના એરપોર્ટથી મંજૂરી આપવામાં આવશે.