Gujarati News

અમદાવાદ :કોરોના મહામારી વચ્ચે હવે સમગ્ર દેશમાં લોકડાઉન 5.0 અંતર્ગત સોમવારથી ધીમે-ધીમે ત્રણ ચરણમાં ખોલી દેવાની કેન્દ્ર સરકાર દ્વારા છૂટછાટ આપવામાં આવી છે. ત્યારે રાજ્યના મુખ્યમંત્રી વિજયભાઈ રૂપાણીએ મોટી રાહત અપાતી જાહેરાત કરી છે જેમાં સચિવાલય સહિત સરકારી કચેરીઓ આવતી કાલથી 1 જૂનથી શરૂ કરવાની જાહેરાત કરવામાં આવી છે.

 ગુજરાતમાં હવે અનેક સેવાઓ અને સરકારી કચેરીઓને પણ સંપૂર્ણપણે સોમવારથી પ્રારંભ કરવાનો આદેશ આપી દેવામાં આવ્યો છે. ત્યારે આ સંદર્ભમાં અમદાવાદ રહેતા સરકારી કર્મચારીઓને ગાંધીનગર પહોંચવામાં સમસ્યા ના નડે તે માટે પોઇન્ટની બસની સેવાનો સોમવારથી પ્રારંભ કરાશે. આ બસો અમદાવાદનાં વિવિધ વિસ્તારોમાંથી ગાંધીનગર સુધી આવવા રવાના થશે.

વાહન વ્યવહાર મંત્રી આર.સી ફળદુએ જણાવ્યું કે, ‘રાજ્ય સરકારનાં કર્મચારીઓ અને કચેરીઓ માટે એસ.ટી દ્વારા ચલાવવામાં આવતી અમદાવાદ-ગાંધીનગરની પોઇન્ટ બસ સેવાઓ આવતી કાલ 1 જૂનથી માત્ર અમદાવાદ મહાનગરનાં કન્ટેઈનમેન્ટ ઝોન સિવાયનાં વિસ્તારોમાંથી ગાંધીનગર સુધી આવવા માટે શરૂ કરવામાં આવશે. ગૃહ વિભાગનાં જાહેરનામાં અનુસાર આ પોઇન્ટ બસ સેવાઓ બસની કુલ પેસેન્જર કેપેસિટીનાં 50 ટકા કેપેસિટી સાથે જ શરૂ કરવામાં આવશે. આ પોઇન્ટ સેવાની બસમાં ઊભા રહીને કોઈ પણ પેસેન્જર મુસાફરી નહીં કરી શકે.

આ પોઇન્ટ સેવાની બસમાં વચ્ચેનાં રૂટ પરથી કોઈ જ પેસેન્જર લેવામાં આવશે નહીં. એટલું જ નહીં પરંતુ મુસાફરોએ સોશિયલ ડિસ્ટન્સિંગનું પણ પાલન તેમજ ફરજિયાત માસ્કનો ઉપયોગ કરવાનો રહેશે. બસમાં પ્રવેશ આપતા પહેલાં જ પ્રત્યેક મુસાફરોનું ટેમ્પ્રેચેર પણ ચેક કરવામાં આવશે. જેથી દરેક મુસાફરે બસ ઉપાડવાનાં નિર્ધારિત સમયથી 15 મિનિટ પહેલા પોઇન્ટ પર પહોંચવાનું રહેશે. આવી બસોને દરેક ટ્રીપ બાદ સંપૂર્ણ સેનેટાઇઝ કરવામાં આવશે.