Gujarati News

અમદાવાદ, તા. ૩૦ : પરિવારની વિરુદ્ધમાં જઈને પ્રેમ લગ્ન કરનારી ૨૨ વર્ષની નેહાને (નામ બદલ્યું છે) પસ્તાવાનો વારો આવ્યો છે. લગ્નને હજુ માંડ દોઢ મહિના જેટલો સમય થયો છે ત્યાં તેના પતિની અસલિયત સામે આવી ગઈ છે. લગ્ન બાદના શરુઆતના દિવસો નવદંપતી માટે ખૂબ મહત્વના હોય છે. પરંતુ નેહા માટે આ દિવસો ઝેરના ઘૂંટ સમાન સાબિત થયા. દોઢ મહિનાની અંદર તેના પતિ મોહિતે (નામ બદલ્યું છે) ન માત્ર તેની સોનાની વસ્તુઓ વેચી કાઢી પરંતુ પિયરમાંથી પૈસા લાવવા માટે દબાણ પણ કરવા લાગ્યો. નેહાએ પૈસા લાવવાનો ઈનકાર કરી દેતા મોહિતે તેને ફટકારી હતી અને થોડા વાળ પણ કાપી નાખ્યા હતા. આ સમગ્ર મામલે નરોડા પોલીસ સ્ટેશનમાં ફરિયાદ નોંધવામાં આવી છે.

નેહા અને મોહિત આશરે દોઢ વર્ષથી રિલેશનશિપમાં હતા. જો કે, નેહાનો પરિવાર તેની સખત વિરુદ્ધમાં હતો. તેથી તેણે ભાગીને લગ્ન કરવાનું નક્કી કર્યું હતું. નેહા અને મોહિતે ૧૦મી નવેમ્બર, ૨૦૨૦ના રોજ લગ્ન કર્યા હતા. લગ્ન બાદ તેઓ રાજસ્થાન જતા રહ્યા હતા. જ્યાં આઠ દિવસ સુધી રહ્યા બાદ અમદાવાદ પરત આવ્યા હતા અને થોડા દિવસ મોહિતના મિત્રના ઘરે રોકાયા હતા. આ દરમિયાન મોહિત પાસે પૈસા ખતમ થઈ જતાં નેહાએ પોતાની સોનાની બુટ્ટી અને વીંટી વેચી દીધી હતી. જેના પૈસા મોહિતે પોતાની પાસે રાખ્યા હતા. પૈસાની વધારે જરૂર પડતાં નેહાએ અંતે પોતાના મિત્રો પાસેથી ઉધાર લીધા હતા. જે બાદ બંને ભાડાના મકાનમાં રહેવા લાગ્યા હતા.

લગ્નનો એક મહિનો નહોતો થયો ત્યાં ફરીથી પૈસા ખતમ થઈ જતાં મોહિતે નેહાને પિયરમાંથી પૈસા લઈ આવવા માટે દબાણ કર્યું હતું. જો કે, નેહાએ ઈનકાર કરતાં કહ્યું હતું કે, મેં પરિવારની વિરુદ્ધમાં જઈને લગ્ન કર્યા હોવાથી પરિવારે મારી સાથે છેડો ફાડી નાખ્યો છે. તેથી હું ત્યાં નહીં જાઉં. પરંતુ મોહિત નેહાની વાતને સમજવા માગતો નહોતો. નેહાએ ઈનકાર કરી દેતાં તે ઉશ્કેરાયો હતો અને માર માર્યો હતો. ત્યારબાદ તો આ નિત્યક્રમ થઈ ગયો અને નાની-નાની બાબતમાં તે પત્નીને ત્રાસ આપવા લાગ્યો. થોડા દિવસ પહેલા મોહિતે ફરીથી નેહાને કહ્યું હતું કે, જો પૈસા ન લાવવા હોય તો ડિવોર્સ આપી દે. તારા પિયરમાંથી ૫ લાખ રુપિયા લાવીશ તો જ આપણો ઘર સંસાર ચાલશે. પરંતુ પિયરના લોકોએ સંપર્ક કાપી નાખ્યો હોવાથી નેહા પતિનો ત્રાસ સહન કરતી રહી. આ દરમિયાન મોહિતે તેની માતાએ સમગ્ર વાત જણાવી હતી તો વહુને સપોર્ટ કરવાના બદલે તેમણે કહ્યું હતું કે, જો કે પૈસા ન લાવે તો તેને ઘરમાંથી કાઢી મૂક. મંગળવારે ફરીથી મોહિતે આ બાબતે ઝઘડો કર્યો હતો અને ડિવોર્સ આપી દે અથવા પૈસા લઈ આવ તેમ કહ્યું હતું. નેહાએ સતત ઈનકાર કરતાં તે ફરીથી ઉશ્કેરાયો હતો અને તેને ઢોરમાર માર્યા બાદ, વાળ કાપીને ઘર બહાર કાઢી મૂકી હતી.