Gujarati News

અમદાવાદ: એક ચોંકાવનારી ઘટનામાં નારણપુરામાં રહેતા એક ડોક્ટરે પોતાની પત્નીનું દીકરીના ટેનિસ કોચ સાથે અફેર હોવાની પોલીસ ફરિયાદ નોંધાવી છે. નવાઈની વાત એ છે કે, ડોક્ટરે પત્ની અને તેના પ્રેમીને અનેકવાર સમજાવવાના પણ પ્રયાસ કર્યા હતાં, પરંતુ પત્નીએ પોતાના પ્રેમી સાથે સંબંધો યથાવત રાખ્યા હતા. એટલું જ નહીં, પોતાની પત્ની પ્રેમી સાથે ઘણી વાર ભાગી પણ ગઈ હોવાનું ડોક્ટરે ફરિયાદમાં જણાવ્યું છે.

વસ્ત્રાપુરમાં પોતાનું દવાખાનું ધરાવતા ડોક્ટર પ્રદીપ (નામ બદલ્યું છે) ના લગ્ન પંદરેક વર્ષ પહેલા નિલિમા (નામ બદલ્યું છે) સાથે થયા હતા. નિલિમા પહેલા એક પ્રાઈવેટ કંપનીમાં જોબ કરતી હતી. જોકે, એક દીકરા અને દીકરીના જન્મ બાદ તેણે નોકરી છોડી દીધી હતી અને તે ઘર સાચવતી હતી. નિલિમા પોતાની દીકરીને એક ટેનિસ કોચિંગ અકેડમીમાં નિયમિત લઈને જતી હતી.

આ દરમિયાન નિલિમા ટેનિસ કોચ પ્રકાશ (નામ બદલ્યું છે)ના સંપર્કમાં આવી હતી. શરુઆતમાં બંને વચ્ચે મિત્રતા બંધાઈ હતી, અને જોતજોતામાં આ મિત્રતા પ્રેમસંબંધોમાં ફેરવાઈ ગઈ હતી. નિલિમા અને પ્રકાશ ઘણીવાર સાથે ફરવા પણ જતા હતા. પાંચ મહિના પહેલા નિલિમા મુંબઈ પોતાની ફ્રેન્ડને મળવા જાય છે તેમ કહીને થોડા દિવસ માટે બહાર ગઈ હતી.

નિલિમાની ગેરહાજરીમાં તેના પતિ પ્રદીપે ઘરનું કમ્પ્યુટર ચેક કરતા નિલિમાએ કમ્પ્યુટરમાં સેવ કરેલા તેના અને તેના પ્રેમીના અંગત ફોટોગ્રાફ્સ પ્રદીપની નજરમાં આવી ગયા હતા. જેના પર સૌથી વધુ વિશ્વાસ હતો તેવી પત્નીએ જ દગો દીધાનું જાણી પ્રદીપના પગ નીચેથી જમીન ખસી ગઈ હતી. આખરે પ્રદીપે નિલિમા પાછી આવી ત્યારે તેની સાથે આ અંગે વાત કરી હતી.

પોતાનો સંસાર બચાવી લેવા પ્રદીપે નિલિમા તેમજ તેના પ્રેમીને સંબંધ પૂરા કરી દેવા માટે સમજાવ્યા હતા. જોકે, નિલિમા અને પ્રકાશે પ્રદીપની વાત એક કાનેથી સાંભળી બીજા કાનેથી કાઢી નાખી હતી. બંનેએ મળવાનું ચાલુ રાખ્યું હતું, અને પ્રદીપની ગેરહાજરીમાં બંને એકબીજા સાથે ફરવા પણ જતા હતા. આ દરમિયાન નિલિમા અવાર-નવાર પોતાના પ્રેમી સાથે ભાગી પણ ગઈ હતી.

આખરે નિલિમા બે દિવસ પહેલા ફરી પ્રેમી સાથે ઘર છોડી ભાગી જતા કંટાળેલા પ્રદીપે નારણપુરા પોલીસ સ્ટેશને પ્રકાશ પોતાની પત્નીને ભગાડી ગયો છે તેવા આરોપ સાથે તની સામે વ્યભિચારની ફરિયાદ નોંધાવી હતી. પ્રદીપની ફરિયાદને આધારે પોલીસ નિલિમા અને પ્રકાશને પકડી લાવી હતી. જોકે, નિલિમાએ પતિ સાથે ન રહેવાનું કહેતા પોલીસે તેને તેના પિતૃગૃહે મોકલી આપી હતી.