Gujarati News

અમદાવાદ, તા.૨૯, અમદાવાદ શહેરના તુટેલા રોડ મામલે મ્યુનિસિપલ કમિશનર દ્વારા ગુરૂવારના રોજ ૭ એડીશનલ સીટી ઈજનેર સહિત કુલ ૨૬ જેટલા ઈજનેરોને શો-કોઝ નોટિસ આપવામાં આવ્યા બાદ મ્યુનિસિપલ કર્મચારી મંડળ હવે આ મામલે મેદાનમાં આવ્યું છે તેમના દ્વારા ચીમકી આપવામા આવી છે કે,મ્યુનિસિપલ કમિશનર અને શાસકપક્ષ ઈજનેરો સામે કાર્યવાહી કરવાનુ બંધ કરે અન્યથા તમામ યુનિયનો એક થઈ આ મામલે ઉગ્ર લડત આપશે.આ અંગે મળતી માહિતી અનુસાર, મ્યુનિસિપલ કોર્પોરેશનના ઈતિહાસમાં સૌ પ્રથમવાર મ્યુનિસિપલ કમિશનર મુકેશકુમારે ગુરૂવારના રોજ ૭ એડીશનલ ઈજનેરો અને ૧૯ ડેપ્યુટી ઈજનેરોને શહેરના તુટેલા ૪૫ રોડ મામલે ૮૧ થી વધુ શો-કોઝ નોટિસ ફટકારી તમામનો ખુલાસો માંગતા મ્યુનિસિપલ કર્મચારી મંડળના મનહરદાન ગઢવીએ આજે એક લેખિત નિવેદનમાં મ્યુનિસિપલ કમિશનર અને શાસકપક્ષ ઈજનેરોને માનસિક ત્રાસ આપતા હોવાનુ કહી આ કાર્યવાહી બંધ કરવા અથવા તો તમામ યુનિયનો તરફથી ઉગ્ર લડતને ઝેલવા ચીમકી ઉચ્ચારવામાં આવી છે.