Gujarati News

અમદાવાદ: શહેરમાં ચકચાર મચાવનારા 2016ના પાલડી ગેંગરેપ કેસમા કોર્ટમાં આવેલી પીડિતાઅગાઉના નિવેદનથી ફરી જઈને પોક્સો કોર્ટને જણાવ્યું હતું કે, તે અવયસ્ક નહીં, પરંતુ 22 વર્ષની છે અને તેણે આજ દિન સુધી કોઈની સાથે શારીરિક સંબંધ નથી બાંધ્યો તેમજ પોતે વર્જિન છે.

   2016માં જ્યારે આ કેસ નોંધાયો ત્યારે પીડિતા 14 વર્ષની પણ નહોતી તેવું દર્શાવાયું હતું. આ કેસમાં 19 લોકોની ધરપકડ કરવામાં આવી હતી, અને તેમના પર ગેંગરેપનો આરોપ મૂકવામાં આવ્યો હતો. છોકરીના માતા-પિતા તેમજ પિતરાઈઓને પણ તેની સાથે જબરજસ્તી દેહવેપાર કરાવવાનો ચાર્જ લગાવાયો હતો. એટલું જ નહીં, આ છોકરીના પિતા પર તેની જાતિય સતામણી કરવાનો આરોપ પણ મૂકાયો હતો.

   પોલીસે આ ચકચારી કેસમાં જે 19 લોકોની ધરપકડ કરી હતી, તેમાં અમદાવાદની એક પ્રાઈવેટ યુનિવર્સિટીમાં ભણતા ચાર સ્ટૂડન્ટ્સનો પણ સમાવેશ થતો હતો. આ તમામ પર આરોપ હતો કે, તેમણે આ છોકરી પર જુદા-જુદા સ્થળોએ બળાત્કાર ગુજાર્યો હતો, અને તેના મા-બાપે તેને જબરજસ્તી દેહવેપારમાં ધકેલી હતી તેમજ તેના પર રેપ થયો ત્યારે તેની ઉંમર 18 વર્ષથી ઓછી હતી તેવું ઈન્વેસ્ટિગેશન રિપોર્ટમાં બહાર આવ્યું હતું.

   પીડિતાએ પોક્સો કોર્ટના જજ એસએલ ઠક્કરને પોતાનું નિવેદન આપ્યું હતું, જેમાં તેણે દાવો કર્યો હતો કે તેના પિતા જેલમાં કેમ છે તેનો તેને કોઈ ખ્યાલ નથી. છોકરીએ જેલમાં બંધ પોતાની સાવકી માને ઓળખવાનો ઈનકાર કરી દીધો હતો. તેણે એવો દાવો પણ કર્યો હતો કે, તેના પર રેપ થયો જ નથી, એટલું જ નહીં તેણે તમામ આરોપીઓને ઓળખવાનો પણ ઈનકાર કરી દીધો હતો.

   અગાઉ કલમ 164 હેઠળ આપેલા નિવેદન પરથી ફરી જતા તેણે જણાવ્યું હતું કે, તે ક્યારેય કોર્ટમાં ગઈ જ નથી. તે અભણ છે, છતાં પોતાની સહી કરી શકે છે અને પોલીસ સ્ટેશનમાં જ તેની પાસેથી નિવેદન પર સહીઓ કરાવવામાં આવી હતી તેમ પણ તેણે કોર્ટને જણાવ્યું હતું. જ્યારે તેણે FIR થઈ ત્યારે કબજે લેવાયેલા કપડાં ઓળખવાનો પણ ઈનકાર કરી દીધો ત્યારે સ્પેશ્યલ પબ્લિક પ્રોસિક્યુટર નિલેશ લોઢાએ તેને હોસ્ટાઈલ જાહેર કરી હતી.

   ઉલટ તપાસમાં આ છોકરીએ પોતાના અગાઉ આપેલી તમામ વાતોને ખોટી જણાવી હતી. આરોપીના વકીલ આનંદ બ્રહ્મભટ્ટના એક સવાલનો જવાબ આપતા છોકરીએ કહ્યું હતું કે, તેણે આજ સુધી કોઈ પુરુષ સાથે શારીરિક સંબંધ નથી બાંધ્યો અને તે આજની તારીખે પણ વર્જિન છે.