Gujarati News

અમદાવાદ, ગાંધીનગર, સુરત, વડોદરા, રાજકોટ અને ભાવનગરમાં યોજાશે વિવિધ પ્રકારની રમતોઃ દેશભરના ૭ હજાર એથ્‍લેટીક્‍સ ૩૬ જેટલી રમતો રમશે

અમદાવાદ તા. ૨૮: આવતીકાલથી સમગ્ર ગુજરાત ખેલકૂદના ફીવરમાં જકડાશે. આવતીકાલથી ગુજરાતમાં ૩૬મા રાષ્‍ટ્રીય ખેલ મહોત્‍સવનો રંગેચંગે પ્રારંભ થશે. વડાપ્રધાન મોદીના હસ્‍તે આવતીકાલે આ રમતોત્‍સવ ખુલ્લો મુકવામાં આવશે. કુલ ૩૬ જેટલી રમતોમાં દેશભરમાંથી ૭ હજારથી વધુ ખેલાડીઓ ભાગ લેશે. ૩ વર્ષ બાદ યોજાઇ રહેલા આ રમતોત્‍સવ માટેની તમામ તૈયારીઓ પૂર્ણ કરી દેવામાં આવી છે. ગુજરાતના મુખ્‍ય શહેરો અમદાવાદ, રાજકોટ, ભાવનગર, સુરત, વડોદરા અને ગાંધીનગરમાં વિવિધ પ્રકારની રમતો યોજાશે.

આવતીકાલથી ૧૦ ઓક્‍ટોબર સુધી યોજાનારા આ રમતોત્‍સવને લઇને સમગ્ર ગુજરાતમાં હાલ સ્‍પોર્ટસ ફીવર છવાયો હોવાનું જણાય છે. દેશના ખુણે-ખુણેથી આવેલા ખેલાડીઓ પોતપોતાનું કૌવત બતાવવા માટે તૈયાર છે. આવતીકાલે અમદાવાદ ખાતેના નરેન્‍દ્ર મોદી સ્‍ટેડીયમ ખાતે રંગારંગ શુભારંભ યોજવામાં આવશે.