Gujarati News

રાજકોટ તા. ૨૮ : પ્રદેશ ભાજપ દ્વારા નવા મુખ્યમંત્રી શ્રી ભૂપેન્દ્ર પટેલના નવા મંત્રી મંડળના મંત્રીઓની જન આશીર્વાદ યાત્રાનું તા. ૩૦ સપ્ટેમ્બરથી ૧,૨,૩ સપ્ટેમ્બર અને ૮ ઓકટોબરે આયોજન કરાયેલ છે.

મંત્રીઓ અલગ-અલગ વિસ્તારની પરિસ્થિતિથી વાકેફ થાય અને જનજન સુધી પહોંચે તે હેતુ છે. તમામ મંત્રીઓને રાજ્યવ્યાપી અલગ-અલગ જિલ્લા ફાળવી દેવામાં આવેલ છે. વિગતવાર રૂટ અને કાર્યક્રમો જે તે શહેર - જિલ્લા ભાજપ દ્વારા નક્કી કરવામાં આવશે નવી સરકાર પછીનો સંગઠનનો આ પ્રથમ રાજ્યવ્યાપી કાર્યક્રમ છે.

સૌરાષ્ટ્રમાં રાઘવજીભાઇ પટેલ, જીતુ વાઘાણી, કિરીટસિંહ રાણા, બ્રિજેશ મેરજા, અરવિંદ રૈયાણી, આર.સી.મકવાણા, દેવાભાઇ માલમ વગેરે મંત્રીઓ જનઆશીર્વાદ યાત્રા લઇને નીકળશે. પ્રદેશની સૂચિમાં મુખ્યમંત્રીનું નામ નથી પરંતુ તેઓ કોઇ જગ્યાએ ઉપસ્થિત રહે તેવી શકયતા છે.

ગયા મહિને કેન્દ્રના મંત્રીઓ જનઆશીર્વાદ યાત્રા લઇને નીકળેલા. ત્યારબાદ ગુજરાત સરકારમાં નેતૃત્વ પીરવર્તન થતા હવે રાજ્યના નવા મંત્રીઓ જનઆશીર્વાદ યાત્રા લઇને નીકળશે. વિધાનસભાની ચૂંટણીને ધ્યાને રાખીને આ યાત્રાનું આયોજન છે. જે તે જિલ્લા અને મહાનગરના પ્રભારી આજે પોતાને સોંપાયેલ વિસ્તારમાં સ્થાનિક આગેવાનોની બેઠક યોજી રૂટ, સ્વાગત, સંમેલન વિગેરે આયોજન ઘડશે.

પ્રદેશ ભાજપ તરફથી શહેર, જિલ્લા એકમોને જણાવાયું છે કે, યાત્રા માટે સવારથી સાંજ સુધીનો રૂટ બનાવવો. મંત્રીની મુખ્ય ગાડી ઇનોવાને સ્ટીકરથી શણગારવી તથા અન્ય ૧૦ ગાડીઓને પણ શણગારવી, અંદાજે ૨૫ ગાડીઓનો કોન્વે પ્રભાવી રીતે પસાર થાય તેવું આયોજન કરવું. યાત્રા અંગેની ગ્રાફિક ડીઝાઇન પ્રદેશ ભાજપ તરફથી અપાશે. યાત્રાના ઇન્ચાર્જ - સહાયક ઇન્ચાર્જ નક્કી કરવા. યાત્રાનો રૂટ સ્થાનિક રાજકીય - સામાજિક ઉપયોગીતાના આધારે નક્કી કરવો.