Gujarati News

દાહોદના ધાનપુર ખાતે એક આદમખોર દીપડાએ આંતક મચાવ્યો છે. આ આદમખોર દીપડો પાછલા 6 દિવસોમાં 5 જેટલા લોકો પર હુમલો કરી ચૂક્યો છે. ત્યારે વધુ એક મહિલા પર હુમલો કરતા તેનું મોત નિપજ્યું હતું. દીપડાના આતંકના કારણે સ્થાનિક લોકોમાં ફફડાટ મચી જવા પામ્યો છે.

એક સ્થાનિક ન્યૂઝ ચેનલ અનુસાર દાહોદ જિલ્લાના ધાનપુરમાં આવેલા ભાણપુર ગામ ખાતે એક આદમખોર દીપડાએ પાછલા 6 દિવસોથી આતંક મચાવેલો છે. આ દીપડો અત્યાર સુધીમાં 5 લોકો પર શિકાર કરી ચૂક્યો હતો. જેથી તેને પકડવામાં વન વિભાગના કર્મચારીઓ કામે લાગ્યા હતા. ત્યારે રવિવારે દીપડાએ વધુ એક મહિલાને પોતાનો શિકાર બનાવવાનો પ્રયાસ કર્યો હતો. જેમાં મહિલાનું મોત નિપજ્યું છે.

ગામમાં દીપડાના આતંકના કારણે સ્થાનિકોમાં ભયનો માહોય સર્જાયેલો જોવા મળી રહ્યો છે. તો વન વિભાગના પણ 150 જેટલા કર્મચારીઓ દીપડાને પાંજરે પૂરવા માટે પ્રયાસો કરી રહ્યા છે. પરંતુ દીપડો મચક નથી આપી રહ્યો. ઉલ્લેખનીય છે કે દીપડાને ખૂબ જ ચાલાક શિકારી માનવામાં આવે છે, સામાન્ય રીતે જંગલમાં છૂપાઈને રહેવાનું પસંદ કરતો દીપડો શિકારના અભાવે ઘણીવાર નજીકના ગામ કે શહેરમાં પહોંચી જતા હોય છે.