Gujarati News

Gujarati News

News of Saturday, 26th May 2018

સિવિલમાં ડોકટરોની હડતાળ બીજા દિવસે યથાવત રીતે જારી

ડોકટરો પર હુમલાની ઘટના કેમેરામાં આવી નહીં : ડોકટરોની હડતાળ પોલીસ-સત્તાવાળાઓ પર દબાણનો પ્રયાસ હોવાની ચર્ચા : દર્દીઓ અને સંબંધીઓ મુશ્કેલીમાં

અમદાવાદ,તા. ૨૬ : અસારવામાં આવેલી સિવિલ હોસ્પિટલમાં ગઇકાલે ડોકટર પર થયેલા હુમલાને લઇ જુનિયર રેસિડેન્ટ ડોકટરોની હડતાળ આજે સતત બીજા દિવસે પણ યથાવત રહી છે. આજે સવારે જુનિયર ડોકટરોએ રેલી યોજી વિરોધ નોંધાવ્યો હતો અને હુમલાની નિંદા કરી તેને વખોડી કાઢવામાં આવ્યો હતો. બીજીબાજુ, જુનીયર ડોકટરોએ ગઇકાલે સિવિલના ટ્રોમા સેન્ટરના ર્પાકિંગમાં જુનિયર ડોકટર પર થયેલા હુમલા મામલે ડોકટર ફરિયાદ કરવા આવ્યા ન હોવાનું બહાર આવ્યું છે. એટલું જ નહી, શાહીબાગ પોલીસે સિવિલ હોસ્પિટલના સીસીટીવી ફૂટેજ ચેક કરતાં આવી કોઇ ઘટના બની ન હોવાની ચોંકાવનારી વિગતો સામે આવતાં હવે આ સમગ્ર પ્રકરણને લઇ અનેક તર્ક વિતર્કો સર્જાયા છે. તો, બીજીબાજુ, ડોકટરોની બે દિવસથી હડતાળને લઇ સિવિલ હોસ્પિટલમાં દાખલ દર્દીઓ અને તેમના સગાવ્હાલાઓની હાલત કફોડી બની છે. બે દિવસ અગાઉ સારવાર માટે આવેલા દર્દીનાં સગાંએ સિવિલમાં ઓપરેશન થિયેટરમાં ડોકટરો સાથે મારામારી કરી હતી. ડોકટર પર થયેલા હુુમલાના પગલે રેસિડેન્ટ ડોકટરો આરોપીઓની ધરપકડની અને આવા બનાવોને રોકવાની માગ સાથે હડતાળ પર ઊતરી ગયા હતા. પોલીસના ઉચ્ચ અધિકારીઓ અને હોસ્પિટલ તંત્રની સમજાવટ બાદ ડોકટરોએ હડતાળ સમેટી લીધી હતી. હુમલાની ઘટનામાં શાહીબાગ પોલીસે બે આરોપીઓની ધરપકડ પણ કરી લીધી હતી. આ ઘટના બાદ ગઇકાલે સવારે સિવિલના ટ્રોમા સેન્ટરના પાર્કિંગમાં જુનિયર ડોકટર પર હેલ્મેટ પહેરીને આવેલા બે અજાણ્યા શખ્સો હુમલો કરીને ફરાર થઇ ગયા હોવાની વાત સામે આવી હતી. જે મામલેે શાહીબાગ પોલીસને જાણ થતાં ઉચ્ચ અધિકારીઓ સહિતનો કાફલો ઘટનાસ્થળે દોડી ગયો હતો. બીજી તરફ જુનિયર ડોકટરોને આ મામલે જાણ થતાં તેઓ ફરીથી હડતાળ પર ઊતરી ગયા હતા. મામલાની ગંભીરતાને લઇ પોલીસે ડોકટરની ફરિયાદ લેવા ડોકટરનો સંપર્ક કર્યો, પણ તેઓ મળ્યા નહીં. ગઇકાલની હુમલાની ઘટનામાં હજુ સુધી જે ડોકટર હુમલો કરવામાં આવ્યો છે તે ડોકટરે ફરિયાદ નોંધાવી નથી અને જુનિયર ડોકટરો હુમલાખોરોને પકડવાની માગ સાથે હડતાળ પર ઊતરી રેલી કાઢી વિરોધ નોંધાવી રહ્યા છે. પોલીસ તપાસમાં સીસીટીવી ફુટેજ ચેક કરવામાં આવતાં હજુ સુધી હુમલો થયો હોય તેવું બહાર આવ્યું નથી તેમજ ડોકટર પણ હુમલા અંગેની ફરિયાદ નોંધાવવા આવ્યા નથી, તેથી ખરેખર ડોકટર પર હુમલો થયો છે કે કેમ? તેના પર સવાલ ઊભા થઇ રહ્યા છે. જુનિયર ડોકટરો હડતાળ પર ઊતરી જતાં દર્દીઓને ભારે હાલાકીનો સામનો કરવો પડી રહ્યો છે.

બીજી તરફ ગઇકાલના હુમલાને લઇને જુનિયર ડોકટરો હડતાળ પર ઊતરી હોસ્પિટલ સત્તાધીશો અને પોલીસ તંત્ર પર દબાણ લાવવાનો પ્રયાસ કરી રહ્યા હોવાનું સ્પષ્ટ જણાતુ હોઇ હવે પોલીસે તે દિશામાં પણ તપાસના ચક્રો ગતિમાન કર્યા છે.

(7:32 pm IST)
  • નોટબંધીનું પુરજોર સમર્થન કરનારા બિહારનાં મુખ્યમંત્રી નીતીશ કુમારે યૂ ટર્ન લેતા તેનાં પર સવાલો ઉભા કર્યા છે. એક નિવેદનમાં તેમણે કહ્યું કે, નોટબંધીનો લાભ જેટલો મળવો જોઇએ તેટલો નથી મળ્યો. લાભ કેમ નથી મળ્યો તેનું કારણ તેમણે જણાવ્યુ હતું. નોટબંધીની નિષ્ફળતા માટે તેમણે બેંકોને જવાબદાર ઠેરવી હતી. તેમણે કહ્યું કે દેશની પ્રગતીમાં બેંકોની ઘણી મોટી ભુમિકા છે. મુખ્યમંત્રીએ કહ્યું કે, બેંકોને જમા અને પૈસા ઉપાડવા તથા લોન આપવાનું જ કામ નથી કરવાનું, પરંતુ દરેકે દરેક સરકારી યોજનામાં પણ બેંકોની ઘણી મોટી ભુમિકા હોય છે. access_time 1:22 am IST

  • સુરતની લેડી ડૉન અસ્મિતા ગોહિલ ઉર્ફે ભૂરીએ પોતાનો ગુનો કબૂલ્યો છે અને હવે સુધરવાની વાત કરી છે. ભૂરીએ કહ્યું કે મારા પર જે આરોપ લાગ્યા છે તે સાચા છે. વાઈરલ થયેલો વીડિયો પણ મારો છે. ભૂરીએ પોતાની ભૂલ પણ સ્વીકારી અને કહ્યું કે જેલમાંથી બહાર આવીને હું મારી ભૂલ સુધારવા માગું છું. ભૂરીએ કહ્યું કે હવે મને લાગે છે કે મારે સુધરી જવું જોઈએ. ભૂરીએ આ નિવેદન કોર્ટ બહાર આપ્યું હતું. access_time 1:23 am IST

  • રમઝાનમાં યુધ્ધવિરામનું ઉલ્લંઘન સહન નહિ થાય :જમ્મુ-કાશ્મીરના મુખ્યમંત્રી મહેબુબા મુફ્તીની પાકિસ્તાનને ચેતવણી: પાકિસ્તાન રામઝાનથી જોડાયેલ ભાવનાઓનું સન્માન કરે અને સીમા પર સંઘર્ષ વિરામનું ઉલ્લંઘન અટકાવે તેમ સરહદી ક્ષેત્રોમાં પ્રભાવિત લોકોની મુલાકાત દરમિયાન મહેબુબા મુફ્તીએ કહ્યું હતું access_time 1:21 am IST