Gujarati News

સુરત: શહેરની સરદાર માર્કેટ નજીક મેડિકલ સ્ટોરમાં નોકરી કરતા યુવાન સાથે વાયા ફેસબુક વ્હોટસએપ ઉપર મિત્રતા કર્યા બાદ પોતાની ઓળખ યુકેની વતની તરીકે આપી એક યુવતીએ ગિફ્ટ આપવાના બહાને યુવાન પાસેથી જુદાજુદા ચાર્જીસના નામે રૂ.૨.૮૧ લાખ પડાવી લીધા હતા.

પોલીસ સૂત્રો દ્વારા પ્રાપ્ત થતી વિગતો મુજબ સુરતના વરાછા લંબે હનુમાન રોડ લેન્ડમાર્ક મરઘાકેન્દ્ર કિરણ પાર્ક સોસાયટી બી/૩૮ માં રહેતો ૨૩ વર્ષીય ગોપાલ વાલજીભાઈ ગાંગાણી સરદાર માર્કેટ ભાગ્યોદય સોસાયટી ખાતે માહી નામના મેડિકલ સ્ટોરમાં નોકરી કરે છે. છ માસ અગાઉ તેના કુટુંબી ભાઈ દિલીપ ગાંગાણીએ ફેસબુક ઉપર યુકેની એક યુવતી સાથે મિત્રતા કરી હતી. દિલીપને અંગ્રેજીમાં ફાવટ ન હોય તેણે ગોપાલને યુવતી સાથે વાતચીત કરવા કહેતા ગોપાલ તેની સાથે વાત કરતો હતો. તે દરમિયાન તે યુવતીએ પોતાનો વ્હોટ્સએપ નંબર ગોપાલને આપતા બંને એકબીજા સાથે વાત કરતા હતા.