Gujarati News

અમદાવાદઃ મુખ્યમંત્રી વિજય રૂપાણી અને ડેપ્યુટી સી.એમ નિતિન પટેલે સોલા સિવિલ હોસ્પિટલ ખાતે યોજાયેલા સમારંભમાં સરખેજ-ગાંધીનગર-ચિલોડા હાઈવે પર ડેવલપમેન્ટ પ્રોજેક્ટ્સનું ખાતમુહૂર્ત કર્યું હતું. અગાઉ નેશનલ હાઈવે NH 8C તરીકે ઓળખાતો આ રોડને NH 147 તરીકે ઓળખવામાં આવશે અને તેની લંબાઈ 44 કિ.મીની હશે. તે અણદાવાદ શહેર, ગાંધીનગર અને અમદાવાદ જિલ્લાના કેટલાંક વિસ્તારોમાંથી પસાર થશે. રાજ્ય સરકારના અંદાજ મુજબ આ આખા પ્રોજેક્ટ પાછળ લગભગ રૂ. 867 કરોડનો ખર્ચ થશે. આ પૈકી 50% રકમ કેન્દ્ર સરકારના અનુદાનમાંથી આવશે જ્યારે બાકીની 50% રકમ ગુજરાત સરકારને કેન્દ્ર સરકાર તરફથી મળતા રોડ રસ્તાના વિકાસ કાર્યો માટેના ફંડ (CRF)માંથી ફાળવવામાં આવશે.

આ પ્રસ્તાવિત પ્લાનમાં ગુજરાતનો સર્વપ્રથમ 4.18 કિ.મી લાંબો એલિવેટેડ કોરિડોર બનાવવામાં આવશે. સોલા ભાગવત જંકશનથી શરૂ થતો આ કોરિડોર ઝાયડસ હોસ્પિટલ જંક્શન પર પૂર્ણ થશે અને એસ.જી હાઈવે પરના થલતેજ અંડરપાસ સાથે મર્જ થઈ જશે. પ્લાનમાં ચિલોડાથી વૈષ્ણોદેવી સુધીના પટ્ટાને છ લેનનો બનાવવાનું પણ આયોજન છે. હાલમાં આ રોડ ચાર લેનનો છે અને તેની બંને બાજુ 7 મીટર પહોળા સર્વિસ રોડ આવેલા છે.

આ ઉપરાંત સાત નવા ફ્લાય ઓવર, 20 જેટલી બસો પાર્ક કરવાની જગ્યા, પગપાળા જનારાઓ માટે અંડરપાસ, 2 રેલ્વે ઓવરબ્રિજ અને 1 વાહનો માટેનો અંડરપાસ અને બીજી અનેક નવી યોજનાઓ અણલમાં મૂકવામાં આવશે. સાત જેટલા નવા ફ્લાય ઓવરનું બાંધકામ ઈન્ફોસિટી ઘ-0 સર્કલથી સરગાસણ ખ-0 સર્કલ, ગાંધીનગર અને ઉવારસદ જંક્શન, વૈષ્ણોદેવી જંકશન, પકવાન જંક્શન, સાણંદ જંકશન અને ઉજાલા જંક્શન પર બનશે.