Gujarati News

ભરૃચ,તા.૨૫ : અઢી કરોડના હીરા માટે આંગડિયા પેઢીના કર્મચારી પર ફાયરિંગની ઘટના બની હતી. મંગળવારે બનેલી ઘટનામાં અંકલેશ્વરના માંડવા પાસે નેશનલ હાઈવે પર ખાનગી બસમાં જઈ રહેલા આંગડિયા કર્મચારી પર ફાયરિંગ કરવામાં આવ્યું હતું. આ ઘટનામાં બસમાં સવાર એક મુસાફર ઘાયલ થયો હતો. ઘાયલ થયેલી વ્યક્તિને સારવાર માટે ભરૃચની સિવિલ હોસ્પિટલમાં દાખલ કરવામાં આવી હતી. બનાવની જાણ થતાં ઘટના સ્થળ પર પહોંચેલી પોલીસે તપાસ શરૂ કરી છે. બસમાં ઘૂસી ગયેલા લૂંટારૂઓ લૂંટનો પ્રયાસ દરમિયાન મુસાફરની હિંમત જોઈને ત્યાંથી ફરાર થઈ ગયા હતા. પોલીસ દ્વારા આરોપીઓને ઝડપી પાડવા માટે ચક્રો ગતિમાન કરવામાં આવ્યા છે. મંગળવારે વહેલી સવારે લગભગ સાડા ત્રણ વાગ્યે અંકલેશ્વરથી સુરત જતી ખાનગી ટ્રાવેલ્સમાં હીરાની લૂંટનો પ્રયાસ કરવામાં આવ્યો હતો.

          લૂંટારૂઓએ વાલિયા ચોકડી પાસે ઉતરવું છે કહીને બસ ઉભી રખાવી હતી, આ દરમિયાન હીરા લૂંટવાનો પ્રયાસ કર્યો હતો, જોકે મુસાફરે હિંમત બતાવતા લૂંટારૂઓ ડરીને કારમાં બેસીને નાસી ગયા હતા. બસમાં સવાર કંડક્ટર તથા અન્ય મુસાફરે હિંમત બતાવીને બસનો દરવાજો બંધ કરતા લૂંટારૂઓમાંથી એકે બસના દરવાજા પર ફાયરિંગ કરતા એક મુસાફર ઘાયલ થયો હતો. કંડક્ટર સાથે ભાવનગરના મુસાફર અનિલ ડાંગરે લૂંટારૂઓને નિષ્ફળ બનાવવા માટે બસનો દરવાજો બંધ કર્યો હતો, જે બાદ થયલા ફાયરિંગમાં અનિલ ડાંગલ ઘાયલ થયા હતા. આ પછી લૂંટનો પ્રયાસ નિષ્ફળ રહ્યો હતો અને લૂંટારૂઓ ત્યાંથી ફરાર થઈ ગયા હતા. પોલીસે ઘટના સ્થળ પર પહોંચીને તપાસ કરતા લૂંટારૂઓ હિન્દી ભાષી હોવાનું માલુમ પડ્યું હતું. લૂંટારૂઓ ભાવનગરથી અલગ-અલગ સ્ટેન્ડ પરથી બે-બેની જોડીમાં બસમાં સવાર થયા હતા અને નિયત પ્લાન પ્રમાણે બસને ઉભી રખાવીને લૂંટનો પ્રયાસ કર્યો હતો. જેમાંથી એકે પહેલા બસ ઉભી રખાવી હતી આ પછી બાકીના ત્રણે લૂંટનો પ્રયાસ કર્યો હતો. કાર લઈને ઘટના સ્થળ પરથી ફરાર થઈ ગયેલા લૂંટારૂઓને ઝડપી પાડવા માટે ભરૃચ પોલીસે નાકાબંધી કરીને તપાસ શરૂ કરી હતી. જોકે, હજુ સુધી લૂંટારૂઓ પકડાયા હોવાની વિગતો સામે આવી નથી. પોલીસ દ્વારા આ કેસમાં સીસીટીવી ફૂટેજ સહિત ટેક્નોલોજીના આધારે તપાસ કરીને આરોપીઓને ઝડપી પાડવાના પ્રયાસ કરવામાં આવી શકે છે.