Gujarati News

અમદાવાદ: મ્યુનિ.ના દક્ષિણપશ્ચિમ ઝોનના ટીડીઓ - એસ્ટેટ ખાતાની ટીમ દ્વારા આજે જીવરાજપાર્ક-વેજલપુરમાં ત્રીજા માળે ગેરકાયદે બંધાઇ ગયેલી 9 નવી દુકાનોને પોલીસ બંદોબસ્ત હેઠળ તોડી પાડવામાં આવી છે. 132 ફુટના રીંગ રોડ નજીક, જીવરાજપાર્ક પોલીસ ચોકી પાછળ, એન.કે. સ્કુલ પાસે આ ગેરકાયદે બાંધકામ થઇ ગયું હતું.

આ કોમર્શીયલ કોમ્પલેક્સમાં ગ્રાઉન્ડ ફ્લોર અને ફર્સ્ટ ફ્લોરના જુના બાંધકામ ઉપર સેકન્ડ ફ્લોરે 2399 ચો.ફુટમાં 9 દુકાનો બાંધી દેવામાં આવી હતી. મ્યુનિ.એ નોટિસ આપી હોવા છતાં તેને અવગણીને બાંધકામ પૂર્ણ કરી દેવાયું હતું. જો કે ગ્રાઉન્ડ અને ફર્સ્ટ ફ્લોર જુના છે, એટલું જ ટીડીડીઓવાળા કહે છે. તે કાયદેસર છે કે નહીં તેની પણ પુરેપુરી માહિતી તેમની પાસે નથી.

આ ઉપરાંત પૂર્વઝોનના ટીડીઓના કાફલાએ ગોમતીપુરમાં લાલમીલ સર્કલથી કલંદરી મસ્જીદ સુધીના 18.30 મીટર ટીપી રોડ પર થઇ ગયેલાં દબાણો હટાવ્યા હતાં. જેમાં પાંચ શેડ, 40 ઓટલા, 25 ક્રોસવોલ, 15 રેમ્પ, 2 ભંગાર ઓટોરીક્ષા સહીતના દબાણો હટાવી દેવાયા છે.