Gujarati News

સુરત: ગુજરાતના “ડાયમંડ સિટી” ગણાતા સુરતમાં પણ મેટ્રો ટ્રેન પરિયોજના પર કામ શરૂ થઈ ગયું છે. જે માટે ફેઝ-1ના પ્રથમ સેક્શનના 11 કિલોમીટરના એલવેટેડ રુટના 10 સ્ટેશનો અને રૂટ નિર્માણ માટે ફાઈનાન્સિયલ બિડ ખોલવામાં આવી છે.

જેમાં સૌથી ઓછી બોલી 779.73 કરોડ રૂપિયાની લાગી છે. જેમાં સદ્દભાવ અને એસપી સિંગલા જૉઈન્ટ વેન્ચરનો નંબર આવ્યો છે. આ બન્ને કંપનીઓએ જોઈન્ટ કંસોર્ટિયમ અંતર્ગત સૌથી ઓછી બોલી લગાવી છે. જ્યારે દેશની પ્રથમ બુલેટ ટ્રેન યોજનાનો કોન્ટ્રાક્ટ મેળવનાર લાર્સન એન્ડ ટૂબ્રો આ દરમિયાન ત્રીજા ક્રમે રહી છે.

સુરત મેટ્રો રેલ પરિયોજના સાથે સંકળાયેલા અધિકારીઓ તરફથી મળેલી વિગતો મુજબ, માસ રેપિડ ટ્રાંઝીટ સિસ્ટમ અંતર્ગત ગુજરાત મેટ્રો રેલ કોર્પોરેશન લિમિટેડ (GMRCL) એ ફાઈનાન્સિયલ બિડ ખોલી. જેમાં અગાઉ ઓક્ટોબર મહિનામાં ટેક્નિકલ બિડ ખોલવામાં આવી હતી. જેમાં કુલ 6 મોટી ઈન્ફાસ્ટ્રક્ચર કંપનીઓ સામે આવી હતી. જેમાંથી એક કંપની ડિસક્વાલિફાય થઈ ગઈ હતી. જ્યારે અન્ય 5 કંપનીઓમાંથી સદ્દભાવ એસપી સિંગલા જોઈન્ટ વેન્ચરે ફેઝ-1ના કામ માટે સૌથી ઓછી બોલી લગાવી હતી. આખી હવે કોન્ટ્રાક્ટ તેમને જ મળવાની શક્યતા છે.

જણાવી દઈએ કે, આ ફાઈનાન્સિયલ બિડમાં સુરત મેટ્રોના પ્રથમ ફેઝની લાઈન-1માં 21.61 કિલોમીટર લાઈનનો સમાવેશ થાય છે. આ માટે GMRCL દ્વારા 1 જૂને 11 કિલોમીટર માટે 805.356 કરોડનું ટેન્ડર ઈસ્યૂ કરવામાં આવ્યું હતું. જેનો કોન્ટ્રાક્ટ મેળવનાર કંપનીએ 30 મહિનામાં પોતાનું કામ પૂરુ કરીને આપવાનું છે.

GMRCL મુજબ, જાન્યુઆરીના અંત સુધી મેટ્રો રેલ પ્રોજેક્ટનું કંસ્ટ્ર્ક્શન કાર્ય શરૂ થઈ જશે. સૌથી ઓછી બોલી લગાવનાર સદ્દભાવ-એસપી સિંગલા જેવીએ ઈસ્ટર્ન પેરિફેરલ એક્સપ્રેસ વે અને જોધપૂર રિંગ રોડ બનાવી ચૂકી છે.