Gujarati News

રાજકોટ તા. ૨૩ : સરકારે ૩૫ લાખ જેટલા બી.પી.એલ., એન.એફ.એસ.એ. અંત્યોદય વગેરે રેશન કાર્ડ ધારકોના બેંક ખાતામાં રૂ. ૧૦૦૦ જમા કરાવવાની કામગીરી શરૂ કરી છે પરંતુ સ્થાનિક કલેકટર તંત્ર અને સસ્તા અનાજના દુકાનદારો વચ્ચે સંકલનના અભાવે લાખો કાર્ડ ધારકોના બેંક ખાતામાં એન્ટ્રીઓ નહી પડતા આ ૧૦૦૦ની સહાય જમાં નથી થતી પરિણામે આ મુદ્દે રાજકોટ સહિતના જિલ્લાના કાર્ડ ધારકોમાં હોબાળો મચી ગયો છે.

આ અંગે સત્તાવાર સૂત્રોના જણાવ્યા મુજબ સરકારે બી.પી.એલ. અંત્યોદય, એન.એફ.એસ.એ. વગેરે કાર્ડ હોલ્ડરોના બેંક ખાતામાં રૂ. ૧૦૦૦ની સહાય જમા કરાવવા તજવીજ હાથ ધરી છે પરંતુ 'ખાટલે મોટી ખોટ' એ કહેવત મુજબ રાજ્યના આવા લાખો કાર્ડ હોલ્ડરોના રેશનકાર્ડ બેંક ખાતા સાથે લીંક અપ નહી થતાં હવે આવા કાર્ડ હોલ્ડરોના ખાતામાં ૧૦૦૦ કેમ જમા કરાવવા તેવો પ્રશ્ન ઉઠયો છે.

દરમિયાન હવે કલેકટર દ્વારા શહેર - જિલ્લાના ૭૦૦ જેટલા પરવાનેદારોને દુકાન દીઠ ૨૫૦ કાર્ડ હોલ્ડરોના રેશનકાર્ડ બેંક ખાતા સાથે લીંક અપ કરી પાસ બુકમાં એન્ટ્રી વગેરેની કામગીરી સુપ્રત કરવા તજવીજ હાથ ધરતા આ મુદ્દે દુકાનદારોમાં પણ જબરો દેકારો બોલી ગયો છે. કેમકે અગાઉ દુકાનદારોની ફરજમાં આ બાબત ન આવતી હોવા છતાં આ કામગીરી સુપ્રત કરાઇ ત્યારે હાઇકોર્ટમાં કાનુની લડત પણ દુકાનદારો જીતી ગયા છે.

આ ઉપરાંત કેટલાક કાર્ડ ધારકો મૃત્યુ પામ્યા હોય આવા કિસ્સાઓમાં મુશ્કેલી થઇ શકે. આમ, રૂ. ૧૦૦૦ની સહાય બાબતે કલેકટર તંત્ર જબરૂ ધંધે લાગ્યું છે.