News of Friday, 23rd March 2018

બટાકાની આડમાં લઇ જવાતો ૧૪ લાખનો દારૂનો જથ્થો જપ્ત

અમદાવાદ ગ્રામ્ય એલસીબીનો સપાટો-કેપ : શરાબનો જથ્થો હરિયાણાથી રાજકોટ લઇ જવાતો હતો, અસલાલી સર્કલ પાસેથી ટ્રક આંતરીને જથ્થો જપ્ત કરાયો

અમદાવાદ,તા.૨૩ : અમદાવાદ ગ્રામ્ય એલસીબીની ટીમે ગઇકાલે બટાકાની આડમાં એક ટ્રકમાં લઇ જવાતા રૂ.૧૪ લાખની કિંમતના દારૂના જથ્થાને ઝડપી લેતાં ચકચાર મચી ગઇ હતી. એલસીબી પોલીસે હરિયાણાથી રાજકોટ તરફ જઇ રહેલી આ ટ્રકને અસલાલી સર્કલ પાસે આંતરી હતી અને તેમાંથી દારૂ-બીયરનો મોટો જથ્થો જપ્ત કર્યો હતો. પોલીસે આ સમગ્ર મામલામાં બે આરોપી શખ્સોની ધરપકડ કરી વધુ તપાસ હાથ ધરી છે. રાજયમાં દારૂની હેરાફેરી અને જુગારની પ્રવૃત્તિને નાથવા નવા ડીજીપી શિવાનંદ ઝાએ આપેલા નિર્દેશોને પગલે અમદાવાદ ગ્રામ્ય પોલીસે પણ આ મામલે સપાટો બોલાવ્યો હતો અને છેલ્લા એક સપ્તાહમાં જ રૂ.૫૦ લાખથી વધુની કિંમતનો દારૂ જપ્ત કરી તપાસ હાથ ધરી હતી. દરમ્યાન ગઇકાલે અમદાવાદ ગ્રામ્ય એલસીબી પોલીસને ચોક્કસ બાતમી મળી હતી કે, હરિયાણા પાસીંગની એક ટ્રકમાં દારૂ અને બીયરનો જથ્થો રાજકોટ તરફ જઇ રહ્યો છે, જેના આધારે પોલીસે અસલાલી સર્કલ નજીક ચુસ્ત વોચ ગોઠવી હતી. દરમ્યાન હરિયાણા પાસીંગની ટ્રક આવતાં પોલીસે તેને રોકી ડ્રાઇવર અને કલીનરની પૂછપરછ કરતાં તેમના નામ કુલદીપસિંહ પંડિત અને રાહુલ તુશીર(રહે.સોનીપત, હરિયાણા) હોવાનું માલૂમ પડયું હતું. પોલીસે ટ્રકની તપાસ કરતાં ટ્રકમાં બટાકાની થોકબંધ બોરીઓ હતી પરંતુ બોરીઓની પાછળ અને નીચે દારૂ-બીયરની પેટીઓ મળી આવી હતી. પોલીસે જડતી લેતાં અલગ-અલગ બાન્ડની દારૂ-બીયરની બોટલનો મોટો જથ્થો મળી આવ્યો હતો. ટ્રકના ડ્રાઇવર-કલીનરે જણાવ્યું હતું કે,  અમદાવાદ આવીને તેમના શેઠ દિપકભાઇને ફોન કરવાનો હતો અને તે કહે એમ આગળ જવાનું હતુ, તેથી પોલીસે બંને આરોપીઓને ઝડપી તેઓની પાસેથી  બટાકાની બોરીઓ અને દારૂ-બીયરના રૂ.૧૪ લાખના જથ્થા સહિત કુલ રૂ.૨૪.૫૦ લાખનો મુદ્દામાલ જપ્ત કર્યો હતો. સાથે સાથે પોલીસે દિપક દહીયાને ઝડપી લેવાના ચક્રો પણ ગતિમાન કર્યા છે.

(8:17 pm IST)
  • જૂના જમાનાની વિખ્યાત અભિનેત્રી ઝીનત અમાને લગાવ્યો બળાત્કારનો આરોપ : ધડાકો : ફરીયાદ દાખલ : મુંબઈના જૂહુના પોલીસ સ્ટેશનમાં કેસ દાખલ કરાયો : જૂહુના મોહમ્મદ સરફરાઝ ઉપર લગાવ્યો આરોપ : બળાત્કારની સાથે ૧૫ કરોડની છેતરપીંડી પણ કરાયાની ફરીયાદ દાખલ : આરોપી મોહમ્મદ સરફરાઝની ધરપકડ કરવામાં આવી છે access_time 4:21 pm IST

  • રાષ્ટ્રપતી ટ્રમ્પએ લાદેલી વિવિધ ઈમ્પોર્ટ ડ્યુટી બાદ, અમેરિકા - ચાઈના વચ્ચે ટ્રેડ-વોર ફાટી નીકળવાના ભઈથી અમેરિકી શેરબજાર ડાઉ જોન્સ ૭૨૪ પોઈન્ટ તૂટીને આજે ઉંધેમાથે પછડાયું : S&P 500 અને નાસ્ડેક પણ 2% તૂટ્યા : રોકાણકારોના કરોડો ડોલર ડૂબ્યા access_time 1:42 am IST

  • બ્રિટનના ડેટા રેગ્યુલેટરએ બહુચર્ચિત અને વિવાદિત કેમ્બ્રિજ એનાલિટીકા કંપનીની લંડન સ્થીત કચેરીઓની જડતી લેવા અને તેના સર્વર્સને જપ્ત કરવા માટે વોરંટ મેળવી લીધું હોવાનું જાણવા મળે છે. ડેટા એનાલિટિક્સ કંપની કેમ્બ્રિજ એનાલિટીકાએ લોકોની સંમતિ વિના 50 મિલિયન ફેસબુક વપરાશકર્તાઓની વ્યક્તિગત માહિતી એકત્રિત કરવાના સેકળો અખબારોના શ્રેણીબદ્ધ અહેવાલો બાદ આ વોરંટ આપવામાં આવ્યું હતું. access_time 2:28 am IST