Gujarati News

વિસનગર: વિસનગરના ઉદલપુરની સીમમાં પસાર થઇ રહેલી મહેસાણા-મુલસણ રૂટની એસટી બસના ડ્રાઇવરને ચાલુ બસે છાતીમાં દુ:ખાવો ઉપડતાં બસ જમણી સાઇડના ખેતરોમાં ઉતરી ગઇ હતી. સદનસીબે બસમાં સવાર તમામ મુસાફરોનો બચાવ થયો હતો. બીજબાજુ, બેભાન હાલતમાં સારવાર અર્થે ખસેડાયેલા ડ્રાઇવરનું મોત થયું હતું. આ બનાવ અંગે પોલીસે કંડક્ટરના નિવેદનને આધારે નોંધ કરી છે.

મહેસાણા એસટી ડેપોમાં ફરજ બજાવતા કંડક્ટર મહેસાણા તાલુકાના દેલોલી ગામના પ્રકાશભાઇ વિઠ્ઠલભાઇ મકવાણા અને ડ્રાઇવર મુલસણના ચાવડા દશરથજી છગુજી ગુરુવારે સાંજે 7-20 વાગે મહેસાણાથી મુલસણ જવા એસટી બસ (જીજે 18 જે 8661) લઇને નીકળ્યા હતા. રાત્રે 8-15 વાગે બસ ઉદલપુરથી ધારૂસણા તરફ જઇ રહી હતી, ત્યારે અચાનક જમણી સાઇડમાં ખેંચાઇને બાજુના જુવારના વાવેતરવાળા ખેતરમાં ઉતરી ગઇ હતી. આથી બસમાં સવાર ચાર મુસાફરો અને કંડક્ટર ગભરાઇ ગયા હતા.