Gujarati News

વડોદરા: જિલ્લાની દેવ નદીમાં ગઈકાલે કપડા ધોવા ગયેલી મહિલાને મગર તાણી જતા લોહીલુહાણ થયેલી મહિલાનું આખરે સારવાર દરમિયાન મોત નિપજ્યું છે.

વાઘોડિયા તાલુકાના ગોરજ ગામે દેવનદીમાં ગઈકાલે બપોરે કપડા ધોવા ગયેલા 65 વર્ષીય ઝવેરીબેન લક્ષ્મણભાઇ પરમારના પગ પર હુમલો કરી મગર પાણીમાં તાણી જતા મહિલાએ મુકાબલો કર્યો હતો.

એક તબક્કે ગામજનો પણ નદીમાં ઉતરી પડયા હતા અને પથ્થરો મારી મગરને પકડવાનો પ્રયત્ન કર્યો હતો. હિંમતવાન મહિલા મગર સામે જજુમી હતી પરંતુ મગરે તેમના છાતી અને ફેફસાના ભાગે હુમલો કરતાં લોહીના ફુવારા ઉડયા હતા.

આખરે મહિલાને છોડી મગર પાણીમાં ગરકાવ થઇ ગયો હતો. ઈજાગ્રસ્ત મહિલાનું સારવાર દરમિયાન આજે મોત નિપજ્યું છે.