Gujarati News

Gujarati News

News of Tuesday, 16th October 2018

સુરતમાં સાડા ત્રણ વર્ષની બાળકીનું અપહરણ કરી દુષ્કર્મ ગુજાર્યા બાદ હત્યા

બાળકી શનિવારે સાંજે ઘર પાસે રમતા-રમતા અચાનક ગાયબ થઇ ગઇ હતી : સુરત પોલીસે સમગ્ર ઘટના બાબતે પોલીસની ૨૧ ટીમને કામે લગાડવામાં આવી હતી : સીસીટીવી ફૂટેજ ચકાસ્યા બાદ બાળકી જે ઘરમાં રહેતી હતી એ ઘરમાંથી જ તેની લાશ મળી આવી

સુરત તા. ૧૬ : સુરત શહેરના લિંબાયત વિસ્તારમાં રવિવારે સાંજે એક સાડા ત્રણ વર્ષની બાળકી ઘરની બહાર રમતાં-રમતાં અચાનક ગુમ થઈ ગઈ હતી. બાળકીના પરિવારજનોએ અહીં-તહીં શોધખોળ કર્યા બાદ પોલીસમાં ફરિયાદ નોંધાવી હતી. પોલીસે સીસીટીવી ફૂટેજ ચકાસ્યા બાદ તપાસ કરતાં તે જે બિલ્ડિંગમાં રહેતી હતી તેના નીચેના માળના એક બંધ રૂમમાં તપાસ કરતાં બાળકીની લાશ મળી આવી હતી. પ્રાથમિક તપાસમાં બાળકી પર દુષ્કર્મ ગુજાર્યા બાદ તેની હત્યા કરાઈ હોવાનું પોલીસનું માનવું છે.

સુરતના લિંબાયત વિસ્તારમાં શનિવારે સાંજે સાડા ત્રણ વર્ષની બાળકી ગુમ થયાની ફરિયાદ મળ્યા બાદ પોલીસ તંત્ર દોડતું થઈ ગયું હતું. બાળકીના માતા-પિતા મહારાષ્ટ્રના વતની છે અને સુરત શહેરમાં રોજી-રોટી માટે આવ્યા હતા.

પોલીસે ઘટનાની ગંભીરતાને ધ્યાનમાં રાખીને ૨૧ ટીમ બનાવીને બાળકીને શોધવા માટે કામે લગાડી હતી. દરેક ટીમમાં એક પીએસઆઈ સહિત ૧૦ પોલીસ કર્મચારીને સામેલ કરાયા હતા. લિંબાયત પોલીસ સહિત ડીસીબી, એસઓજી અને ક્રામ બ્રાન્ચની ટીમોને પણ તપાસમાં લગાડવામાં આવી હતી.

પોલીસ દ્વારા સમગ્ર વિસ્તારના સીસીટીવી ફૂટેજની તપાસ હાથ ધરવામાં આવી. આ તપાસમાં જાણવા મળ્યું કે, બાળકી ઘરની બહાર નિકળી જ નથી. ત્યાર બાદ સીસીટીવીમાં જોવા મળી રહેલા શંકાસ્પદ વ્યકિતઓ ચકાસવામાં આવ્યા હતા. સંપૂર્ણ તપાસ બાદ પોલીસને જાણવા મળ્યું કે, બાળકી જે ઘરમાં રહેતી હતી એ જ બિલ્ડિંગમાં બાળકી ખોવાઈ એ દિવસથી એક મકાન બંધ હતું.

પોલીસે શંકાને આધારે સોમવારે આ બંધ મકાનું તાળું તોડ્યું ત્યારે અંદરથી બાળકીની લાશ મળી આવી હતી. પ્રાથમિક તપાસમાં નાનકડી બાળકી પર દુષ્કર્મ ગુજાર્યા બાદ તેની હત્યા કરાઈ હોવાનું પોલીસનું અનુમાન છે. પોલીસ સીસીટીવી ફૂટેજના આધારે શંકાસ્પદ વ્યકિતને શોધી રહી છે. બાળકીનો પોસ્ટમોર્ટમ રિપોર્ટ આવ્યા બાદ વધુ વિગતો બહાર આવે તેવી શકયતા છે. પોલીસે તપાસ ચાલુ હોવાના કારણે આરોપી અંગેની પણ કોઈ વિગતો આપવાનો ઈનકાર કર્યો હતો.

સુરત પોલીસે આ અંગે પત્રકાર પરિષદમાં જણાવ્યું કે, અત્યારે હત્યા અને એટ્રોસિટીની કલમ હેઠળ ગુનો દાખલ કરાયો છે. એસીપી કક્ષાના અધિકારીને તપાસ સોંપવામાં આવી છે અને ડીસીપી તેનું મોનિટરિંગ કરશે. પોલીસે સીસીટીવી કેમેરા ચકાસ્યા બાદ જોયું કે, બાળકી બહાર આવતી નથી. પ્રાથમિક શંકાસ્પદ વ્યકિત સામે તપાસ ચાલી રહી છે અને પાકા પુરાવા પ્રાપ્ત થયા બાદ અપરાધીની જાહેરાત કરાશે. બાળકી પહેલા માળે રહેતી હતી અને તેનો મૃતદેહ નીચેના માળેથી મળ્યો છે. વધુ વિગતો પોસ્ટમોર્ટમ રિપોર્ટ આવ્યા બાદ જાહેર કરવામાં આવશે.

બાળકીની માતાએ આ અંગે જણાવ્યું કે, મારી છોકરી શનિવારે સવારે ૮ કલાકથી ગુમ થઈ ગઈ હતી. પહેલાં તો મેં અહીં આજુ-બાજુમાં શોધખોળ કરી હતી. બાળકી કયાંય ન દેખાયા બાદ તેના પિતાને બોલાવીને પોલીસમાં ફરિયાદ કરી હતી. પોલીસ પણ બે દિવસથી તપાસ કરી રહી હતી. ત્યાર બાદ આજે તેની લાશ મળી આવી હતી. નરાધમને હું જાતે જ સજા આપીશ.

ઉલ્લેખનીય છે કે, રાજયમાં નાની બાળકીની દુષ્કર્મ બાદ હત્યાની આ બીજી ઘટના છે. આ અગાઉ હિંમતનગર પાસે પણ એક ત્રણ વર્ષની બાળકીની દુષ્કર્મ ગુજારીને હત્યા કરી દેવાઈ હતી. હિંમતનગરની આ ઘટનાના પડઘા રાજયભરમાં પડ્યા હતા અને પરપ્રાંતિય લોકોને રાજયમાંથી હાંકી કાઢવા માટે તેમને ધાક-ધમકી પણ અપાઈ હતી. પરપ્રાંતિયો પરના હુમલાએ રાજકીય સ્વરૂપ પણ ધારણ કર્યું હતું.(૨૧.૪)

(9:49 am IST)
  • સોમાલીયાના બેડોઆ શહેરમાં આત્મઘાતી બોમ્બ વિસ્ફોટઃ ૧૬ લોકોના મોત : ૫૦ ઘાયલ : સોમાલીયાના બેડોઆ શહેરમાં શનિવારે બે આતંકવાદીઓએ એક રેસ્ટોરા અને હોટલમાં આત્મઘાતી બોમ્બ વિસ્ફોટ કરતા ૧૬ લોકોના મોત નિપજયા છે. જયારે ૫૦ લોકો ઘાયલ થયા છે. આત્મઘાતી હુમલાવાર શહેરના ભીડવાળા વિસ્તારમાંં ઘુસી આવ્યા હતા અને પોતાની જાતને ઉડાવી દીધી હતી. આ હુમલાની જવાબદારી આતંકી સંગઠન અલ-શબાએ લીધી છે access_time 3:31 pm IST

  • 22મીથી તલાટીઓની રાજ્યવ્યાપી હડતાળ :ગુજરાત રાજ્ય તલાટી મહામંડળ દ્વારા ૨૨ તારીખ થી રાજ્યવ્યાપી હડતાળની જાહેરાત કરી : ગુજરાત રાજ્ય તલાટી મહામંડળની મળેલી બેઠકમાં લેવાયો નિર્ણય :લાંબા સમયથી પડતર પ્રશ્નોનુ નિરાકરણ નહીં આવતા આખરે આ નિર્ણય લીધો :૨૨મીએ રાજ્યભરની પંચાયતનો વહીવટ ઠપ્પ કરવાની ચીમકી ઉચ્ચારી access_time 1:05 am IST

  • રાજકોટ:સ્વાઈન ફ્લૂના વધુ 3 પોઝિટિવ કેસ નોંધાયા:શહેરમાં 2 અને જિલ્લાનો એક કેસ નોંધાયો:હાલ 19 દર્દી સારવાર હેઠળ access_time 1:09 am IST