Gujarati News

બોરસદ-વાસદ રોડ ઉપર આવેલા રીલાયન્સ પેટ્રોલપંપ પાસે ગઈકાલે રાત્રીના સુમારે પુરપાટ ઝડપે જતી એક ઈકો કારે બાઈકને ટક્કર મારતાં ચાલકનું સારવાર દરમ્યાન બોરસદની ખાનગી હોસ્પિટલમાં મોત થયું હતુ. આ અંગે બોરસદ શહેર પોલીસે ગુનો દાખલ કરીને તપાસ હાથ ઘરી છે.

અકસ્માતની મળતી વિગતો અનુસાર આસોદ ખાતે રહેતા વિમલભાઈ વિનોદભાઈ પઢિયાર (ઉ. વ. ૨૦)ગઈકાલે રાત્રીના સુમારે પોતાનું બાઈક નંબર જીજે-૨૩, એએસ-૫૮૬૮નું લઈને આસોદરથી બોરસદ તરફ થઈ રહ્યો હતો ત્યારે રાત્રીના સવા દશેક વાગ્યાના સુમારે વાસદ-બોરસદ રોડ ઉપર આવેલા રીલાયન્સ પેટ્રોલપંપ પાસે પુરપાટ ઝડપે આવી ચઢેલ ઈકો કાર નંબર જીજે-૬, કેપી-૬૧૦૫એ ટક્કર મારતાં વિમલને માથામાં તથા શરીરના અન્ય ભાગોએ ગંભીર ઈજાઓ થવા પામી હતી. જેથી ૧૦૮ મોબાઈલ વાન દ્વારા તેને તુરંત જ સારવાર માટે બોરસદની એક ખાનગી હોસ્પિટલમાં લઈ જવામાં આવ્યો હતો. જ્યાં રાત્રીના સવા એક વાગ્યાના સુમારે તેનું અવસાન થયું હતુ.

આ અંગે ભયલાલભાઈ પઢિયારની ફરિયાદને આધારે ટક્કર મારીને ફરાર થઈ ગયેલા ઈકો કારના ચાલક વિરૂધ્ધ ગુનો દાખલ કરીને તેને ઝડપી પાડવાના ચક્રો ગતિમાન કરવામાં આવ્યા છે.