Gujarati News

અમદાવાદ: શહેરની રોનક ગણાતા સીજીરોડ પર દિન-પ્રતિદિન ખાણી-પીણીની લારીઓની સંખ્યામાં વધારો થતો જાય છે. એક પ્રકારે સીજીરોડ અનધિકૃત રીતે ખાણી-પીણીના બજાર તરીકે વિકસી રહ્યો છે. સીજીરોડ પર અન્ય ધંધાર્થીઓના લારી-ગલ્લાઓ પણ ટ્રાફિકને અડચણરૂપ બન્યા છે, પરંતુ મ્યુનિસિપલ સત્તાવાળાઓને સીજીરોડનું ગૌરવ જાળવી રાખવામાં રસ નથી.

છેલ્લા કેટલાક સમય સીજીરોડની ગરિમાને લારી-ગલ્લાના અનધિકૃત દબાણથી દાગ લાગ્યો છે. સીજીરોડ પર પાર્કિંગની જગ્યાઓમાં પણ લારી-ગલ્લા જોવા મળે છે. જે રીતે આશ્રમરોડ પરના ગેરકાયદે લારી-ગલ્લાના ધંધાર્થીઓ મોટી રકમની ઉઘરાણી કરતી એસ્ટેટ વિભાગની દબાણની ગાડી અને દબાણ હટાવવાના સ્ટાફના કારણે દૂર થતા નથી તે જ પ્રકારની રીતરસમ એસ્ટેટ વિભાગ દ્વારા સીજીરોડ પરના ગેરકાયદે ધંધાર્થીઓને છાવરવા અપનાવાઇ રહી છે. પરિણામે સીજીરોડ પરના દબાણ સતત વધી રહ્યા છે.

મૂકેશકુમાર સમક્ષ સીજીરોડ ખાતે પાર્કિંગ જગ્યાએ ઊભા રહેતા લારી-ગલ્લાના ધંધાર્થીઓ અંગેની ફરિયાદ આવતાં તેઓ પણ ચોંકી ઊઠ્યા હતા. મૂકેશકુમારે સીજીરોડને તત્કાળ દબાણમુક્ત કરવાની પશ્ચિમ ઝોનના એસ્ટેટ વિભાગને સૂચના અાપી છે, પરંતુ હજુ સુધી એસ્ટેટ વિભાગ હરકતમાં આવ્યો નથી.