Gujarati News

વડોદરા ,  તા.૧૧ : વડોદરામાં વધુ એક ચોંકાવનારો કિસ્સો પ્રકાશમાં આવ્યો છે, કે જેમાં ૬ વર્ષની દીકરી તથા તેની માતાની લાશ મળી આવી છે. શહેરના સમા વિસ્તારમાં બનેલી આ ઘટનામાં અનેક તર્ક વિતર્ક થઈ રહ્યા છે. પોલીસે આ કેસમાં મૃતક મહિલાના પતિની અટકાયત કરીને તપાસ શરુ કરી છે. એક તરફ શહેરમાં હિના પેથાણી ઉર્ફે મહેંદીની હત્યાના કેસમાં ચકચાર મચેલી છે ત્યારે આ નવા કેસથી ફરી શંકા-કુશંકાઓ થવા લાગી છે. જોકે, હકીકત શું છે તે અંગે પોલીસ તપાસ બાદ જ જાણી શકાશે.

સમા વિસ્તારમાં કેનાલ પાસેની ચંદનવાડી સોસાયટીમાં બનેલી ઘટનામાં શોભના પટેલ અને તેમની છ વર્ષની માસુમ દીકરી રાત્રે ગરબા રમીને આવ્યા પછી ઘરે આવીને સૂઈ ગયા હતા. જોકે, આજે સવારે બન્નેની હત્યા કે આત્મહત્યા કરીને તેને લઈને લોકોમાં ભારે કુતૂહલતા ફેલાયેલી છે. મળતી વિગતો પ્રમાણે મૃતક દીકરીના પિતાએ તેને ઉઠાડવાની કોશિશ કરી તો તે ઉઠી નહોતી પછી બન્ને તાત્કાલિક ખાનગી હોસ્પિટલમાં લઈ જવામાં આવ્યા હતા. હોસ્પિટલમાં ડૉક્ટરોએ માતા-પુત્રીને મૃત જાહેર કર્યા બાદ અનેક ચર્ચાઓ શરુ થઈ છે. તેજસ પટેલે વર્ષ ૨૦૧૩માં જ શોભના સાથે લગ્ન કર્યા હતા.

પોલીસને ઘટના અંગે જાણ થતાં કાફલો ઘટના સ્થળ પર પહોંચી ગયો હતો. બન્નેના પોસ્ટમોર્ટમ માટે મૃતદેહોને સયાજી હોસ્પિટલમાં મોકલ્યા હતા. હવે આ હત્યા છે કે પછી આત્મહત્યા તે પોસ્ટમોર્ટમના રિપોર્ટ બાદ જ જાણી શકાશે.

રિપોર્ટ્સ મુજબ આ કેસમાં પોલીસને પ્રાથમિક તપાસમાં જાણવા મળ્યું છે કે મૃતક મહિલાનો પતિ તેજસ ઘર જમાઈ તરીકે રહેતો હતો. જે ખાનગી કંપનીમાં સેલ્સમેન તરીકે નોકરી હતો, હવે પોલીસ મૃતક મહિલાના તેના પતિ સાથે કેવા સંબંધ હતા તે દિશામાં પણ વધુ તપાસ કરશે. બીજી તરફ પોસ્ટ મોર્ટમના રિપોર્ટ્સ આવ્યા બાદ આ હત્યા છે કે આત્મહત્યા તેનો પણ ખુલાસો થશે.