Gujarati News

વડોદરા:લોકડાઉન સમયગાળામાં જિલ્લા પંચાયતના સભ્ય સંચાલિત સોખડા અને વાસણા કોતરીયા ગામની રેશનિંગ દુકાનમાંથી સરકારી અનાજ વગે કરવાનું કૌભાંડ ઝડપાયા બાદ આ બંને દુકાનોના લાયસન્સ કાયમી ધોરણે રદ કરી દેવામાં આવ્યા છે.

સોખડાથી મંજુસર જતા રસ્તા ઉપર ઘઉંનો શંકાસ્પદ  જથ્થા ભરેલી ગાડી જિલ્લા એલસીબીએ ઝડપી પાડયા બાદ આ જથ્થાની વડોદરા ગ્રામ્ય મામલતદાર દ્વારા તપાસ કરાવતા આ જથ્થો સરકારી વ્યાજબી ભાવની દુકાન એટલે કે રોશનની દુકાનનો હોવાનું તથા સોખડા ગામે સોખડા-૧ દુકાન સંચાલક રૃપેશભાઈ વસાવા તથા વાસણા-કોતરિયા રોડ સોખડાના સંચાલક તેમજ જિલ્લા પંચાયતના સભ્ય ભાઈલાલભાઈ મકવાણાની દુકાનનો હોવાનું બહાર આવતા જે તે સમયે પોલીસ દ્વારા એફઆઈઆર દાખલ કરવામાં આવી હતી.

ગ્રામ્ય મામલતદાર દ્વારા તપાસ કરાતા આ જથ્થો બંનેની દુકાનોનો સંયુક્ત હોવાનો મામલતદારે રિપોર્ટ આપ્યો હતો. તથા સોખડા-૧ના  દુકાનદાર રૃપેશ વસાવા પોતાની નિર્ધારિત જગ્યાના  બદલે વાસણા-કોતરીયા રોડ પર આવેલી ભાઈલાલભાઈ મકવાણાની દુકાને વિતરણ કરતા  હોવાનું મામલતદારે જણાવ્યું હતું. તે સમયે જિલ્લા પુરવઠા અધિકારીએ બંને દુકાનોના પરવાના ૯૦ દિવસ માટે સસ્પેન્ડ કરી દીધા હતા.