Gujarati News

સુરતઃ પીરિયડના દિવસો દરમિયાન થતો દુઃખાવો અસહ્ય હોય છે. આ દિવસો દરમિયાન મૂડ સ્વિંગ તેમજ બ્રેસ્ટમાં દુઃખાવો થતી હોવાની પણ યુવતીઓની ફરિયાદ હોય છે. પીરિયડના ૫ દિવસો એવા હોય છે જયારે કામ કરવાની વાત તો દૂર બેસવાનું પણ મુશ્કેલ થઈ જતું હોય છે. એમાય જો કોઈ યુવતી કે મહિલા ઓફિસમાં કામ કરતી હોય તો તેના પર બેવડું ભારણ.

મહિલાઓની આ જ સમસ્યાને ધ્યાનમાં રાખીને ફૂડ ડિલિવરી એગ્રીગેટર ઝોમેટોએ હાલમાં જ તેમને ત્યાં કામ કરતી મહિલા કર્મચારીઓ માટે ૧૦ દિવસની 'પીરિયડ લીવ' આપવાની પહેલ કરી છે અને હવે સુરતની ડિજિટલ માર્કેટિંગ કંપનીએ પણ આવી જ કંઈક જાહેરાત કરી છે.

iVIPANAN કંપનીના સ્થાપક ભૌતિક શેઠે રવિવારે મહિલા કર્મચારીઓને ૧૨ દિવસની પીરિયડ લીવ આપવાની જાહેરાત કરી હતી. કંપનીની સ્થાપના ૨૦૧૪માં થઈ હતી. જયાં ૯ કર્મચારીઓમાંથી ૮ મહિલા કર્મચારી છે.

વધારે સ્વસ્થ અને ખુશ વાતાવરણ આપવાની પ્રક્રિયામાં અમે તાત્કાલિક અસરથી આજથી (રવિવાર) અમારી ટીમની તમામ મહિલા કર્મચારીઓ માટે મેન્સ્ટ્રુઅલ સાયકલ લીવ જાહેર કરી રહ્યા છીએ', તેમ શેઠે કર્મચારીઓને મોકલેલા ઈ-મેઈલમાં લખ્યું હતું.

'અમે અમારી ટીમને વધારે અનુકૂળતા કેવી રીતે આપી શકીએ, વર્કિંગ એન્વાયરમેન્ટ હ્યુમન ફ્રેન્ડલી કેવી રીતે બનાવી શકાય, વર્કિંગ એન્વાયરમેન્ટ હેલ્થી અને હેપ્પી કેવી રીતે બનાવી શકાય તે અંગે અમે હંમેશા વિચારતા રહીએ છીએ', તેમ તેમણે ઉમેર્યું હતું.

અમારા સહયોગી ટાઈમ્સ ઓફ ઈન્ડિયા સાથે વાતચીત કરતાં ભૌતિક શેઠે કહ્યું કે, 'પીરિયડ લીવ'દરમિયાન મહિલા કર્મચારીઓને કેટલી અગવડતા પડે છે તે વાતને અમે જાણીએ છીએ. કામ અંગેનું તણાવ અને ઓફિસનું વાતાવરણ તેમના દુઃખાવામાં અને અગવડતામાં વધારો કરે છે. હવે, અમારી કંપનીની કોઈ પણ મહિલા કર્મચારી તેમની મેન્સ્ટ્રુઅલ સાયકલ દરમિયાન દર મહિને એક પેઈડ લીવ લઈ શકે છે'.

શેઠે કહ્યું કે, મેન્સ્ટ્રુઅલ સાયકલને લઈને આપણા સમાજમાં હજુ પણ જડતા છે.  આજે પણ ઓફિસમાં કામ કરનારી મહિલાઓ વોશરુમ જતી વખતે પોતાના હાથમાં બેગ, પર્સ કે પ્લાસ્ટિક બેગ લઈ જતા શરમ અનુભવે છે. અમારે આ કલંકને તોડવું છે અને ભારતના દરેક નાના બિઝનેસને મેસેજ આપવો છે કે, સ્ત્રી-પુરુષ વચ્ચે જે બાયોલોજિકલ તફાવત છે તેને સમજો', તેમ તેમણે અંતમાં કહ્યું હતું.